سنّت کی بہار آئی فیضانِ مدینہ میں

Sunnat ki bahaar aayi Faizaan-e-Madina mein

Rehmat ki ghata chhaayi Faizaan-e-Madina mein

Is shehr ke aaye hain baahar se bhi aaye hain

Sarkaar ke shaidaayi Faizaan-e-Madina mein

Daarhi se imaamay hain zulfon ki baharein hain

Shaitan ko sharm aayi Faizaan-e-Madina mein

Lamhaat-e-masarrat hain deewanay baray khush hain

Kyun jhoomay na har bhai Faizaan-e-Madina mein

Sunnat ki bahaaron ka kuchh aisa samaan chhaaya

Fashion ko haya aayi Faizaan-e-Madina mein

Ulfat ke ukhuwwat ke kya khoob manaazir hain

Goya hain sagay bhai Faizaan-e-Madina mein

Woh log hi aatay hain aur faiz uthaatay hain

Taqdeer jinhein laayi Faizaan-e-Madina mein

Apnay hon ya begaanay yoon miltay hain deewanay

Jaisay hon shinasaayi Faizaan-e-Madina mein

Dard apnay dilon mein jo Islam ka rakhtay hain

Hai un ki pazeeraayi Faizaan-e-Madina mein

Allah karam kar de tu bakhsh de un sab ko

Maujood hain jo bhai Faizaan-e-Madina mein

Sunnat ka liye jazba aaye jo yahan us ki

Hai hausla-afzaayi Faizaan-e-Madina mein

Iblees-e-la'een sun le ab khair nahin teri

Shaamat teri hai aayi Faizaan-e-Madina mein

"Faizaan-e-Madina" mein "Faizaan-e-Madina" hai

Faizaan hai Aaqaayi Faizaan-e-Madina mein

Faizaan-e-Madina hi hai "Da'wat-e-Islami"

Faizaan hai Maulaayi Faizaan-e-Madina mein

Maqbool jahan bhar mein ho "Da'wat-e-Islami"

Har lab pe dua aayi Faizaan-e-Madina mein

Aaqa ho karam sab par bulwao Madine mein

Aaye hain tamannaayi Faizaan-e-Madina mein

Sarkaar ata kar do gham sab ko Madine ka

Jitnay hain yahan bhai Faizaan-e-Madina mein

Qismat ka sikandar hai zoron pe muqaddar hai

Jis ne bhi jagah paayi Faizaan-e-Madina mein

Aaj Aaqa ke deewanay kya mast hain mastaanay

Attar hai Eid aayi Faizaan-e-Madina mein