بے وفا دنیا پہ مت کر اعتبار

Be wafa dunya pe mat kar eitibar

Tu achanak maut ka hoga shikar

Maut aakar hi rahe gi yaad rakh!

Jaan ja kar hi rahe gi yaad rakh!

Gar jahan mein sau baras tu jee bhi le

Qabr mein tanha qayamat tak rahe

Jab farishta maut ka chha jaye ga

Phir bacha koi na tujh ko paye ga

Maut aayi pehlwan bhi chal diye

Khoobsurat naujawan bhi chal diye

Dabdaba dunya hi mein reh jaye ga

Zor tera khaak mein mil jaye ga

Teri taaqat tera fan ohda tera

Kuch na kaam aaye ga sarmaya tera

Qabr rozana yeh karti hai pukaar

Mujh mein hain keeray makorhay beshumar

Yaad rakh main hoon andheri kothri

Tujh ko hogi mujh mein sun wehshat barhi

Meray andar tu akela aaye ga

Haan magar a'maal leta aaye ga

Narm bistar ghar pe hi reh jayen gay

Tujh ko farsh-e-khaak par dafnayein gay

Ghup andheri qabr mein jab jaye ga

Be-amal! be-intiha ghabraye ga

Kaam maal-o-zar wahan na aaye ga

Ghafil insan yaad rakh pachtaye ga

Jab teray saathi tujhay chhorh aayein gay

Qabr mein keeray tujhay kha jayein gay

Qabr mein tera kafan phat jaye ga

Yaad rakh nazuk badan phat jaye ga

Tera ik ik baal tak jharh jaye ga

Khoobsurat jism sab sarh jaye ga

Aah! ubal kar aankh bhi beh jaye gi

Khaal udharh kar qabr mein reh jaye gi

Saanp bichhoo qabr mein gar aa gaye!

Kya kare ga be-amal gar chha gaye!

Gor-e-nekan baagh hogi khuld ka

Mujrimon ki qabr dozakh ka garha

Khilkhila kar hans raha hai be-khabar!

Qabr mein roye ga cheekhain maar kar

Kar le tauba Rabb ki rahmat hai barhi

Qabr mein warna saza hogi karhi

Waqt-e-aakhir ya Khuda! Attar ko

Khair se Sarkar ka deedar ho