ٹھنڈی ٹھنڈی ہوا مدینے کی

Thandi thandi hawa Madine ki

Mehki mehki faza Madine ki

Aarzu hai Khuda Madine ki

Mujh ko galiyan dikha Madine ki

Din hai kaisa munawwar-o-roshan

Raat raunaq-faza Madine ki

Chhaaon to har jagah ki thandi par

Dhoop bhi waah wa Madine ki

Kaif-aawar hai mausam-e-sarma

Garmiyan marhaba Madine ki

Phool to phool khaar bhi dilkash

Pattiyan dilkusha Madine ki

Hai chaman tu haseen kaanton ki

Jhaadiyan khushnuma Madine ki

Hai pahaadon pe noor ki chaadar

Waadiyan marhaba Madine ki

Sabz Gumbad ka husn kya kehna

Jaaliyan dilkusha Madine ki

Kaif-o-masti bhara samaan hai waan

Kaif-aawar faza Madine ki

Har ghadi rahmatein barasti hain

Hai mubarak hawa Madine ki

Zarra zarra wahan ka noorani

Hai munawwar faza Madine ki

Zulmat-e-shab daraayegi kyun kar!

Har taraf hai ziya Madine ki

Ghamzado aankh khol ke dekho

Chha gayi hai ghata Madine ki

Kyun ho mayoos ae mareezo! tum

Le lo khaak-e-shifa Madine ki

Jholiyan bhar ke tu bhi laayega

Raah le ae gada Madine ki

Mere murjhaaye dil ko jhonka de

Aake baad-e-saba Madine ki

Meri qismat mein kaatib-e-taqdeer

Likh de likh de qaza Madine ki

Qaafile haajiyon ke hain tayyar

De do rukhsat shaha! Madine ki

Hai tamanna Baqee-e-Gharqad ki

Bhaiyo! do dua Madine ki

Saltanat ki talab nahin Aqa

Ho gadaai ata Madine ki

Kaash! har aan yaad tadpaaye!

Har nafas ho sada Madine ki

Raat din yeh tumhare deewane

Maangte hain dua Madine ki

Ro rahe hain ghareeb ke un ko

Yaad aayi shaha! Madine ki

Apne joote utaar lena tum

Jab gali dekhna Madine ki

Choom ke phool, dhool ko bhi tum

Jhoom ke choomna Madine ki

Khaak-e-dar ka laga ke surma tum

Raahatein lootna Madine ki

Ek muddat hui judai ko

Ho ijazat ata Madine ki

Khoob jhoomein ge laut jaayein ge

Dekhte hi faza Madine ki

Mujh ko qadmon mein maut de kar phir

De do thodi si jaa Madine ki

Haaye afsos! main bana insaan

Khaak kyun na bana Madine ki

Jaa ke Attar phir Madine mein

Rahmatein lootna Madine ki