اے بیابانِ عَرَب تیری بہاروں کو سلام

Ae bayabaan-e-Arab teri bahaaron ko salaam

Tere phoolon ko tere paakeeza khaaron ko salaam

Jabal-e-Noor-o-Jabal-e-Saur aur un ke ghaaron ko salaam

Noor barsaate pahaaron ki qataaron ko salaam

Jhoomte hain muskuraate hain mugheelaan-e-Arab

Khoobsoorat waadiyon ko raigzaaron ko salaam

Raat din rehmat barasti hai jahan par jhoom kar

Un tawaaf-e-Kaaba ke rangeen nazaaron ko salaam

Daur kar deewaar-e-Kaaba se jo lipte hain wahan

Un sabhi deewanon saare beqaraaron ko salaam

Hajar-e-Aswad, baab-o-meezaab-o-maqaam-o-multazam

Aur ghilaaf-e-Kaaba ke rangeen nazaaron ko salaam

Mustajaar-o-mustajaab-o-chah-e-Zamzam aur mataaf

Aur Hateem-e-Paak ke donon kinaaron ko salaam

Rukn-e-Shaami aur Iraaqi aur Yamaani par durood

Jagmagaate noor barsaate manaaron ko salaam

Jo Musalman Khaana-e-Kaaba ka karte hain tawaaf

Un ko balke saare hi sajda-guzaaron ko salaam

Khoob choome hain qadam Saur-o-Hira ne Shah ke

Mehke mehke pyaare pyaare donon ghaaron ko salaam

Madani munnon ka bhi hamla khoob tha Bu Jahl par

Badr ke un donon nanhe jaan nisaaron ko salaam

Jagmagaate Gumbad-e-Khazra pe hon roshan durood

Masjid-e-Nabawi ke nooraani manaaron ko salaam

Mimbar-o-mehraab-e-jaanan aur sunehri jaaliyan

Sabz gumbad ke makeen ko donon pyaaron ko salaam

Sayyidi Hamza ko, aur jumla shaheedan-e-Uhud

Ko bhi aur sab ghaaziyon ko shehsawaaron ko salaam

Jis qadar jinn-o-bashar mein the sahaba Shah ke

Sab ko bhi beshak khusoosan chaar yaaron ko salaam

Jis jagah par aake soye hain sahaba das hazaar

Us Baqee-e-Paak ke saare mazaaron ko salaam

Shauq-e-deedaar-e-Madina mein tarapte hain jo, un

Beqaraaron, dilfigaaron, ashka-baaron ko salaam

Ghusl-e-Kaaba ka bhi manzar kis qadar pur-kaif hai

Jhoom kar kehta hai Attar in nazaaron ko salaam