مرحبا صد مرحبا صل علی خوش آمدید

Marhaba sad marhaba sall-e-ala khush aamdeed

Aamad-e-noor-e-Khuda sall-e-ala khush aamdeed

Ya Habeeb-e-Kibriya sall-e-ala khush aamdeed

Taajdaar-e-ambiya sall-e-ala khush aamdeed

Ae mere mushkil-kusha sall-e-ala khush aamdeed

Jaan-o-dil tum par fida sall-e-ala khush aamdeed

Sarwar-e-arz-o-sama sall-e-ala khush aamdeed

Ae Shah-e-har do sara sall-e-ala khush aamdeed

Shams mein teri ziya sall-e-ala khush aamdeed

Mah mein tera chaandna sall-e-ala khush aamdeed

Kyun yeh ghar ghar roshni hai aaj kis ka jashn hai?

Aamina ke laal ka sall-e-ala khush aamdeed

Aaj kyun chaaron taraf yeh marhaba ki dhoom hai

Kyun hai har soo ghalghala sall-e-ala khush aamdeed

Baat yeh hai aaj dunya mein hue hain jalwa-gar

Meethe meethe Mustafa sall-e-ala khush aamdeed

Marhaba jashn-e-wilaadat marhaba sad marhaba

Noor-e-ain-e-Aamina sall-e-ala khush aamdeed

Jashn-e-Milad-un-Nabi ki dhoom hai chaaron taraf

Har koi hai keh raha sall-e-ala khush aamdeed

Rahmatul-lil-aalameen ki ho gayi jalwa-gari

Baab-e-rahmat waa hua sall-e-ala khush aamdeed

Chashm-e-ma raushan dil-e-ma shaad ae jaan-e-chaman

Ae khusha mah-e-liqa sall-e-ala khush aamdeed

Chhat gaye zulmat ke baadal door andhera ho gaya

Noor wala aa gaya sall-e-ala khush aamdeed

Khaana-e-Ka'aba mein jo but the sab aundhe gir pare

Dabdaba aamad ka tha sall-e-ala khush aamdeed

Ambiya-o-mursaleen sab ki imaamat ka tere

Sar pe hai sehra saja sall-e-ala khush aamdeed

Aamina ke ghar mein jab aamad Muhammad ki hui

Chaar soo yeh shor utha sall-e-ala khush aamdeed

Khoob sadqa bat raha hai Aamina ke ghar pe aaj

Aaye Shah-e-As-khiya sall-e-ala khush aamdeed

Hum ghareebon ke to bas waare hi nyaare ho gaye

Dar tumhaara mil gaya sall-e-ala khush aamdeed

Bhar do seene mein suroor aur aankh kar do noor noor

Dil mera do jagmaga sall-e-ala khush aamdeed

Qabr mein jalwa Nabi ka dekh kar Attar kaash!

Bol uthe be-saakhta sall-e-ala khush aamdeed