اے کاش شب تنہائی میں

Ae kaash shab-e-tanhai mein, furqat ka alam tarpata rahe

Lamha lamha ulfat ki aag ko aur bhi tu bharkata rahe

Betaab jigar, qalb-e-muztar, deed kijiye Sarwar! chashm-e-tar

Har waqt bharun thandi aahein, gham tera khoon rulata rahe

Bechain rahun betaab rahun, main hichkiyan baandh ke rota rahun

Ye zauq-e-junoon barhta hi rahe, har dam ye mujh ko rulata rahe

Main ishq mein yun gum ho jaaun, hargiz na pata apna paaun

Jab jab main tarap kar gir jaaun, tera dast-e-inayat uthata rahe

Jab aaun Madine rota hua, ho samne jab rauza tera

Uth jaye naqab-e-rukh, saaqi! tu jaam-e-deed pilata rahe

Bekas hun shaha! main dukhiyara, logon ne mujhe hai dhutkara

Tu hamdam hai phir kya gham hai, go sara jahan thukrata rahe

Sad shukr Khudaya tu ne diya, hai rahmat wala wo Aaqa

Jo ummat ke ranj-o-gham mein, raaton ko ashk bahata rahe

Jab garmi-e-hashr ho zoron par, us waqt tamanna hai Sarwar!

Hum pyaas ke maaron ko Kausar, ke jaam pe jaam pilata rahe

Hai meri tamanna Rab-e-jahan, har khurd-o-kalan, har ek jawan

Har "Dawat-e-Islami" wala, sunnat ka alam lahrata rahe

Hai tujh se dua Rab-e-Akbar! maqbool ho "Faizan-e-Sunnat"

Masjid masjid ghar ghar parh kar, Islami bhai sunata rahe

Jab mera yaawar hai Sarwar, phir dar mahshar ka ho kyonkar!

Wo hashr mein ruswa kaise kare jo aib yahan pe chhupata rahe

Jab tan se juda ho jaan-e-muztar us waqt ho jalwa pesh-e-nazar

Ho qabr mein bhi saya-gustar, jo meethi neend sulata rahe

Ya Rab! ye dua Attar ki hai jab tak zinda duniya mein rahe

Mehboob ki sunnat aam kare, ye danka deen ka bajata rahe