جو بھی سرکار کا عاشق زار ہے

Jo bhi sarkar ka aashiq-e-zaar hai

Us ki thokar pe daulat ka anbaar hai

Saltanat se usey kya sarokaar hai

Waaste iqtidaar us ke be-kaar hai

Jo ke deewaana Shah-e-Abrar hai

Jis ka dil un ki ulfat se sarshaar hai

Un ki sunnat ka jo aaina-daar hai

Bas wahi to jahan mein samajhdaar hai

Aatish-e-shauq mein kaash! jalta rahoon

Aur khayal-e-Madina mein khoya rahoon

Bas 'Madina Madina' hi karta rahoon

Yeh dua meri ae Rabb-e-Ghaffar hai

Door dunya ke ho jaayein ranj-o-alam

Mujh ko mil jaaye meethe Madine ka gham

Ho karam ho karam ya Khuda ho karam!

Waasta us ka jo Shah-e-Abrar hai

Aah! isyaan ke toofaan mein jaan-e-chaman

Phans gaya hai safeena ae Shah-e-zaman

Bas tumhein ek ummeed ki ho kiran

Tum jo chaaho to beeda mera paar hai

Ro raha hai yeh jo hichkiyan baandh kar

Yaad aaya hai is ko Nabi ka nagar

Kya karoge tabeebo! isey dekh kar

Chhod do yeh Madine ka beemar hai

Meethe meethe Madine ki mehki faza

Har Musalman ko ya Ilahi! dikha

Us Shah-e-Karbala ka tujhe waasta

Jo jawanaan-e-jannat ka sardar hai

Aah! ranj-o-alam ki nahi koi hadd

Kaam karti nahi ab to aql-o-khirad

Al-madad ae mere rehnuma al-madad

Paaon zakhmi hain aur raah pur-khaar hai

Mujh ko soz-e-Bilal aur soz-e-Raza

De do soz-e-Uwais, soz-e-madani Zia

Waasta Tujh ko Aaqa usi Ghaus ka

Shah-e-Baghdad jo tera dildaar hai

Bhar ke jaate hain mangte jahan jholiyan

Bhool jaate hain gham gham ke maare jahan

Jis jagah dushmano ne bhi paayi amaan

Mere meethe Nabi ka woh darbaar hai

Woh Habeeb-e-Khuda sarwar-e-ins-o-jaan

Jis ke zair-e-tasarruf hain donon jahan

Us pe qurbaan dil us pe qurbaan jaan

Jo Khuda ki khudaai ka mukhtaar hai

Ae muqaddar ki roothi hawao suno!

Haal-e-dil par na yoon muskurao suno!

Aandhiyo! gardisho! tum bhi aao suno!

Mustafa mera haami-o-ghamkhwaar hai

Toote go sar pe koh-e-bala sabr kar

Ae muballigh na tu dagmaga sabr kar

Lab pe harf-e-shikaayat na la sabr kar

Ke yahi sunnat-e-Shah-e-Abrar hai

Ya Habeeb-e-Khuda mujh pe chashm-e-ata

Kar do tum bahr-e-Ghaus-o-Raza-o-Zia

Le kar ummeed-e-afw-o-karam sarwara

Dar pe haazir tumhara gunahgaar hai

Khwah Tu daulat na de koi sarwat na de

Chaahe izzat na de koi shohrat na de

Takht-e-shahi na de aur hukoomat na de

Tujh se Attar tera talabgaar hai