میٹھا مدینہ دور ہے جانا ضرور ہے

Meetha Madina door hai jaana zaroor hai

Jaana hamein zaroor hai jaana zaroor hai

Raah-e-Madina ka to har kaanta bhi phool hai

Deewana ba-sha'oor hai jaana zaroor hai

Hota hai sakht imtihan ulfat ki raah mein

Aata magar suroor hai jaana zaroor hai

Ishq-e-Rasool dekhiye Habshi Bilal ka

Zakhmon se choor choor hai jaana zaroor hai

Pur khaar raah paaon mein chhaale bhi par gaye

Is mein bhi ik suroor hai jaana zaroor hai

Himmat jawaab de gayi Sarkar al-madad!

Zaair thakan se choor hai jaana zaroor hai

Kyun thak gaye palat gaye himmat gaye kyun haar!

Ye aap ka qusoor hai jaana zaroor hai

Tujh ko daraati hain safar ki jo suoobatein

Ye nafs ka futoor hai jaana zaroor hai

Ushaaq ko to milti hai gham mein bhi rahat aur

Aata bara suroor hai jaana zaroor hai

Sarkar ka Madina yaqeenan bila-shuba

Qalb-o-nazar ka noor hai jaana zaroor hai

Manzar haseen-o-dilruba un ke dayaar ka

Haan dekhna zaroor hai jaana zaroor hai

Dekhun ga ja ke Gumbad-e-Khazra ki main bahaar

Rauza watan se door hai jaana zaroor hai

Mehraab-o-mimbar aap ke doobe hain noor mein

Jaali bhi noor noor hai jaana zaroor hai

Chaadar tani hai Gumbad-e-Khazra pe noor ki

Meenaar noor noor hai jaana zaroor hai

Pur noor har pahaar to Taiba ki khaak ka

Har zarra rashk-e-Toor hai jaana zaroor hai

Shah-o-gada faqeer-o-ghani har kisi ka sar

Kham aap ke hazoor hai jaana zaroor hai

Behtar isi baras ho to jaldi bulaiye

Ye iltija hazoor hai jaana zaroor hai

Marzi tumhari tum suno ya mat suno magar

Apni to rat hazoor hai jaana zaroor hai

Attar qaafila to gaya tum bhi uth chalo

Manzil agarcha door hai jaana zaroor hai