اے عازم طیبہ! میں طلبگار دعا ہوں

Taybah ke musaafir mujhe tu bhool na jaana

Ae aazim-e-Taybah! main talabgaar-e-dua hun

Ro ro ke Nabi ko meri roodaad sunana

Ae aazim-e-Taybah! main talabgaar-e-dua hun

Ho mujh pe karam sadqe mein Sultan-e-duna ke

Dikhla de manazir mujhe Arafaat-o-Mina ke

Kehta tha phir Allah mujhe Hajj pe bulaana

Ae aazim-e-Taybah! main talabgaar-e-dua hun

Be-chara Madine se bohat door pada hai

Badkaar sahi par tera deewana bada hai

Kehta tha mujhe haaziri ka izn dilaana

Ae aazim-e-Taybah! main talabgaar-e-dua hun

Kehna bada arsa hua Taybah nahi pohoncha

Barson se nahi dekh saka gumbad-e-Khazra

Miskeen ko ab qadmon mein sarkar bulaana

Ae aazim-e-Taybah! main talabgaar-e-dua hun

Ae raah-e-Madina ke musaafir tu thehar kar

Majboor ki bipta zara sun kaan ko dhar kar

Kar Haq se dua ranj-o-alam is ke mitaana

Ae aazim-e-Taybah! main talabgaar-e-dua hun

Tu Rabb ka hai mehmaan rah-e-jaanan ka hai aazim

Main sakht gunahgaar-o-khata-kaar hun mujrim

Allah se kar arz isey dozakh se bachaana

Ae aazim-e-Taybah! main talabgaar-e-dua hun

Allah ke ghar ka joon hi dekhe tu duwaara

Jis waqt ke Kaabe ka kare pehla nazaara

Gar hosh hon qaaim tere mujh ko na bhulaana

Ae aazim-e-Taybah! main talabgaar-e-dua hun

Ro ro ke tu karna mere haq mein yeh duaayein

Bole na fuzool aur rakhe neechi nigaahein

Kar arz Khuda se tu isey naik banaana

Ae aazim-e-Taybah! main talabgaar-e-dua hun

Behkaata hai shaitaan to hai nafs sataata

Tauba bhi bohat karta hai par bach nahi paata

Kar Haq se dua is ko gunahon se bachaana

Ae aazim-e-Taybah! main talabgaar-e-dua hun

Sakraat ke sadme mere bas mein nahi sehna

Ro ro ke yeh kehta tha tu sarkar se kehna

Jalwa bhi dikhaana mujhe kalma bhi padhaana

Ae aazim-e-Taybah! main talabgaar-e-dua hun

Kehta tha bure khaatime ka khauf bada hai

Dekha hai isey baar-ha yeh ro bhi pada hai

Ya Rabb! isey eemaan pe dunya se utthaana

Ae aazim-e-Taybah! main talabgaar-e-dua hun

Sharmande ko Allah Tu sharminda na karna

Be-poochhe hi de bakhsh qiyamat mein na dharna

Kar arz Khuda se isey jannat mein basaana

Ae aazim-e-Taybah! main talabgaar-e-dua hun

Jab tak ho Madine mein muyassar tujhe rehna

Rozana salaam mera tu sarkar se kehna

Khairaat shafa'at ki tabarruk mein le aana

Ae aazim-e-Taybah! main talabgaar-e-dua hun

Ikhlaas ki Allah isey kar de ata bheek

Aur gusse ki aadat tale akhlaaq bhi hon theek

Hasnain ke sadqe isey hans-mukh tu banaana

Ae aazim-e-Taybah! main talabgaar-e-dua hun

Chhaayi hai mere rukh pe gunahon ki siyaahi

Maqsoom na ho jaaye kaheen bhai tabaahi

Kar arz, unhein aata hai taqdeer banaana

Ae aazim-e-Taybah! main talabgaar-e-dua hun

Kehna ke nadaamat isey isyaan pe badi hai

Dehleez pe maut aa ke shaha is ke khadi hai

Tum naza mein deedaar ka jaam is ko pilaana

Ae aazim-e-Taybah! main talabgaar-e-dua hun

Kehta tha Karachi mein nahi mujh ko hai marna

Ro ro ke guzarish tu yeh sarkar se karna

Sultan-e-Madina isey qadmon mein sulaana

Ae aazim-e-Taybah! main talabgaar-e-dua hun

Tu Dawat-e-Islami ke haq mein yeh dua de

Islam ka danka yeh zamaane mein baja de

Farmaayein karam is pe Shahanshah-e-zamaana

Ae aazim-e-Taybah! main talabgaar-e-dua hun

Jab gumbad-e-Khazra ko nazar jhoom ke choome

Jab wajd mein aa kar ke tu be-saakhta jhoome

Kehna: kahein, Attar hamara hai deewaana

Ae aazim-e-Taybah! main talabgaar-e-dua hun