عطا کر دو مدینے کی اجازت یارسول الله

Ata kar do Madine ki ijazat Ya Rasul Allah

Karun main Sabz Gumbad ki ziyarat Ya Rasul Allah

Kuchh aisa ho karam maah-e-risalat Ya Rasul Allah

Karun Allah ki dil se ibadat Ya Rasul Allah

Sahaaba ka gada hun aur Ahl-e-Bait ka khaadim

Ye sab hai aap hi ki to inayat Ya Rasul Allah

Tumhara fazl hai ke main ghulam-e-Ghaus-o-Khwaja hun

Na ho kam auliya ki dil se ulfat Ya Rasul Allah

Usi Ahmad Raza ka waasta jo mere murshid hain

Ata kar do mujhe apni muhabbat Ya Rasul Allah

Madina meetha meetha hai Madina pyaara pyaara hai

Madine se mujhe behad hai ulfat Ya Rasul Allah

Main hun Sunni rahun Sunni marun Sunni Madine mein

Baqi-e-Paak mein ban jaye turbat Ya Rasul Allah

Namazon mein mujhe hargiz na ho susti kabhi Aaqa

Parhun paanchon namazein ba-jama'at Ya Rasul Allah

Bare bhai bahan ka main kaha maana karun har dam

Karun maa baap ki din raat khidmat Ya Rasul Allah

Bare jitne bhi hain ghar mein adab karta rahun sab ka

Karun chhote bahan bhai pe shafqat Ya Rasul Allah

Main sab se "Aap" keh kar pyaar se baatein karun Aaqa

Jhirakne ki ho meri door aadat Ya Rasul Allah

Adab ustaad-e-deeni ka mujhe Aaqa ata kar do

Dil-o-jaan se karun un ki itaat Ya Rasul Allah

Karam kar do ke mera hafiza mazboot ho jaye

Na ho ustaad ko mujh se shikayat Ya Rasul Allah

Main gaane baajon aur filmon dramon ke gunah chhorun

Parhun naatein karun aksar tilawat Ya Rasul Allah

Hasad, waada-khilafi, jhoot, chughli, gheebat-o-gaali

Mujhe in sab gunahon se ho nafrat Ya Rasul Allah

Mere akhlaaq achhe hon mere sab kaam achhe hon

Bana do mujh ko tum paband-e-sunnat Ya Rasul Allah

Zaroorat se ziyada maal-o-daulat ka nahin taalib

Rahe bas aap ki nazar-e-inayat Ya Rasul Allah

Rahein sab shaad ghar waale shaha thori si rozi par

Ata ho daulat-e-sabr-o-qana'at Ya Rasul Allah

Sab ahl-e-hashr mahshar mein unhi ko dhoondte honge

Pukarein ge sabhi roz-e-qayamat Ya Rasul Allah

Bahut kamzor hun qaabil nahin hargiz azaabon ke

Khudaya saath lete jaana Jannat Ya Rasul Allah

Mujhe tum Ya Rasul Allah de do jazba-e-tableegh

Shaha deta phirun naiki ki dawat Ya Rasul Allah

Shaha! Attar par har aan rahmat ki nazar rakhna

Kare din raat ye sunnat ki khidmat Ya Rasul Allah