جب تلک یہ چاند تارے جھلملاتے جائیں گے

Jab talak yeh chaand taare jhilmilaate jaayenge

Tab talak jashn-e-wiladat hum manaate jaayenge

Un ke aashiq noor ki shamein jalaate jaayenge

Jabke haasid dil jalaate satpataate jaayenge

Naat-e-Mahboob-e-Khuda sunte sunaate jaayenge

Ya Rasool Allah ka naara lagaate jaayenge

Hashr tak jashn-e-wiladat hum manaate jaayenge

"Marhaba Ya Mustafa" ki dhoom machaate jaayenge

Chaar jaanib hum diye ghee ke jalaate jaayenge

Ghar to ghar saare, mahalle ko sajaate jaayenge

Hum Rabi-un-Noor mein jhande hare lehraayenge

Saari galiyan roshni se jagmagaate jaayenge

Eid-e-Milad-un-Nabi ki shab charaaghaan kar ke hum

Qabr noor-e-Mustafa se jagmagaate jaayenge

Hum juloos-e-jashn-e-Milad-un-Nabi mein jhoom kar

Raaste bhar marhaba ki dhoom machaate jaayenge

Laakh shaitan hum ko roke fazl-e-Rabb se taa abad

Jashn Aaqa ki wiladat ka manaate jaayenge

Jhoom kar saare kaho, Aaqa ki aamad marhaba

Hashr mein bhi hum yahi naara lagaate jaayenge

Ya Rasool Allah ka naara lagaao zor se

Un ke dushman munh phulaate barbaraate jaayenge

Tum karo jashn-e-wiladat ki khushi mein roshni

Woh tumhaari gor-e-teera jagmagaate jaayenge

Do jahaan ke Shah ki shaahi sawaari aa gayi

Rahmatoon ke woh khazaane ab lutaate jaayenge

Aa rahe hain Shaafi-e-Mahshar utho ae aasiyo!

Hum gunahgaaron ko Haq se bakhshwaate jaayenge

Ho gayi subh-e-bahaaraan kaif-aawar hai samaan

Khush-naseebon ko woh ab jalwa dikhaate jaayenge

Subh-e-saadiq ho gayi sab Aamina ke ghar chalein

Noor ki barsaat hogi hum nahaate jaayenge

Zikr-e-Milad-e-Mubaarak kaise chhorein hum bhala

Jin ka khaate hain unhein ke geet gaate jaayenge

Munaqqad karte rahein ge ijtima-e-zikr-o-naat

Dhoom un ki naat-khwaani ki machaate jaayenge

Kar lo niyyat khoob koshish kar ke hum apna amal

Madani inaamaat par har dam barhaate jaayenge

Kar lo niyyat sunnaton ki tarbiyat ke waaste

Qaafilon mein hum safar karte karaate jaayenge

Khoob barsein gi janaaze par Khuda ki rahmatein

Qabr tak Sarkar ki naatein sunaate jaayenge

Hashr mein zer-e-Liwa-e-Hamd ae Attar hum

Naat-e-Sultan-e-Madina gungunaate jaayenge