ہو مبارک اہل ایماں عید میلاد النبی

Ho mubarak ahl-e-imaan Eid-e-Milad-un-Nabi

Ho gayi qismat darakhshaan Eid-e-Milad-un-Nabi

Khoob khush hain hoor-o-ghilmaan Eid-e-Milad-un-Nabi

Har malak hai shaadmaan Eid-e-Milad-un-Nabi

Chaar soo hain kya chhama chham rahmaton ki baarishein

Jhoomte hain abr-e-baaraan Eid-e-Milad-un-Nabi

Noor ki phuhaar barsi chaar soo hai roshni

Ho gaya ghar ghar charaaghaan Eid-e-Milad-un-Nabi

Chaar jaanib dhoom hai Sarkaar ke meelaad ki

Jhoomta hai har Musalmaan Eid-e-Milad-un-Nabi

Arsh par chaaron taraf sall-e-ala ki dhoom hai

Aa gaye hain Noor-e-Yazdaan Eid-e-Milad-un-Nabi

Ghunchay chatkay, phool mehkay har taraf aayi bahaar

Ho gayi subh-e-bahaaraan Eid-e-Milad-un-Nabi

Jaante ho kyun hai raushan aasmaan par kehkashaan

Hai kiya Haq ne charaaghaan Eid-e-Milad-un-Nabi

Hum na kyun raushan karein ghar ghar diye meelaad ke

Khud kare jab Haq charaaghaan Eid-e-Milad-un-Nabi

Eid-e-Milad-un-Nabi to Eid ki bhi Eid hai

Bilyaqeen hai Eid-e-Eedaan Eid-e-Milad-un-Nabi

Eid-e-Milad-un-Nabi par jo bhi karta hai khushi

Us pe ghurraata hai shaitaan Eid-e-Milad-un-Nabi

Aamina ke ghar Muhammad ki wilaadat ho gayi

Khoob jhoomo ahl-e-imaan Eid-e-Milad-un-Nabi

Aao deewaano! chalo sab Aamina ke ghar chalein

Noor se bhar laaein daamaan Eid-e-Milad-un-Nabi

Khoob jhoomo ae gunaahgaaro! tumhaari Eid hai

Ho gaya bakhshish ka saamaan Eid-e-Milad-un-Nabi

Gham ke maaro! be-sahaaro! bas tumhaari Eid hai

Ho gaya raahat ka saamaan Eid-e-Milad-un-Nabi

Be-qaraaro! dil-figaaro! bas tumhaari Eid hai

Kyun ho hairaan-o-pareshaan Eid-e-Milad-un-Nabi

Gham-naseebo! ab ghamon ka door andhera ho gaya

Tum manaao khoob khushiyan Eid-e-Milad-un-Nabi

Khil uthe murjhaaye dil aur jaan mein jaan aa gayi

Aa gaye hain jaan-e-jaanaan Eid-e-Milad-un-Nabi

Be-kason ke din phire aur gham ke maare hans pare

Ho gaya khushiyon ka saamaan Eid-e-Milad-un-Nabi

In sha Allah aaj "Eedi" mein milegi maghfirat

Hai jabhi shaitaan pareshaan Eid-e-Milad-un-Nabi

Ya Nabi! apni wilaadat ki khushi mein apna gham

Deejiye Taiba ke Sultaan Eid-e-Milad-un-Nabi

Eid-e-Milad-un-Nabi ka waasta Attar ko

Bakhsh de ae Rabb-e-Rahmaan Eid-e-Milad-un-Nabi