قلب میں عشق آل رکھا ہے

Qalb mein ishq-e-Aal rakkha hai

Khoob is ko sambhaal rakkha hai

Aisa jood-o-nawaal rakkha hai

Sab ghulaamon ko paal rakkha hai

Shukr tera ke un ki ummat mein

Mujh ko ae Zuljalal rakkha hai

Jama kar ke kabhi na Sarwar ne

Koi maal-o-manaal rakkha hai

Hubb-e-duniya ne Ya Rasul Allah

Mujh ko mushkil mein daal rakkha hai

Jo bhi dekhe bane woh deewana

Un mein aisa jamaal rakkha hai

Jald leeje khabar gunahon ke

Dard ne kar nidhaal rakkha hai

Aisa do ishq sab kahein is ke

Dil mein soz-e-Bilal rakkha hai

Naar-e-dozakh jalaayegi kyun kar

Dil mein ishq un ka daal rakkha hai

Hun gunahgar par ghulaamon mein

Tum ne ab bhi bahaal rakkha hai

Main nisaar aap ne sada mera

Har qadam par khayaal rakkha hai

Main jahannam mein gir gaya hota

Aap hi ne sambhaal rakkha hai

Mustafa ne hamare aibon par

Parda daaman ka daal rakkha hai

Shukriya tum ne Aal ka sadqa

Meri jholi mein daal rakkha hai

"Chal Madina" ki bheek mil jaaye

Aashiqon ne sawaal rakkha hai

De do zaad-e-safar Madine ka

Saailon ne sawaal rakkha hai

Dekho deewano! Sabz Gumbad mein

Kaisa husn-o-jamaal rakkha hai

Kyun jahannam mein jaaoon seene mein

Ishq-e-Ashaab-o-Aal rakkha hai

Main kabhi ka bhatak gaya hota

Mustafa ne sambhaal rakkha hai

Aashiq-e-maal is mein soch aakhir

Kya urooj-o-kamaal rakkha hai?

Tujh ko mil jaayega jo qismat mein

Teri, rizq-e-halaal rakkha hai

Is jahan ke kamaal mein beshak

Ik na ik din zawaal rakkha hai

Tujh se Aqa tere sawaali ne

Maghfirat ka sawaal rakkha hai

Sun lo shaitan ne har soo shahwat ka

Khoob phaila ke jaal rakkha hai

Jannati hai woh jis ne sunnat ke

Khud ko saanche mein dhaal rakkha hai

Jo hai gustakh-e-Mustafa us ko

Main ne dil se nikaal rakkha hai

Woh Musalman naseeb wala hai

Jis ke paas un ka baal rakkha hai

Muflisi ka main kyun karun shikwa

Nematon se nihaal rakkha hai

Maal ki hirs mat karo is mein

Do jahan ka wabaal rakkha hai

Yeh karam hi to un ka hai Attar

Tujh mangte ko paal rakkha hai