شدائد نزع کے کیسے سہوں گا یارسول الله

Shadaaid naz'a ke kaise sahun ga Ya Rasul Allah

Andheri qabr mein kaise rahun ga Ya Rasul Allah

Mujhe marna hai Aaqa Gumbad-e-Khazra ke saaye mein

Watan mein mar gaya to kya karun ga Ya Rasul Allah

Na chhode jurm choot-te hain na maare nafs marta hai

Na jaane nek aakhir kab banun ga Ya Rasul Allah

Sada meethi nazar rakhna agar tum ho gaye naaraaz

Qasam Rabb ki kahin ka na rahun ga Ya Rasul Allah

Andhera kaat khaata hai akele khauf aata hai

To tanha qabr mein kyun-kar rahun ga Ya Rasul Allah

Nakeerain imtehaan lene ko jab aayein ge turbat mein

Jawaabaat un ko Aaqa kaise doon ga Ya Rasul Allah

Baraaye naam dard-e-sar saha jaata nahin mujh se

Azaab-e-qabr kaise sah sakun ga Ya Rasul Allah

Yahan cheenti bhi tadpa de mujhe to qabr ke andar

Shaha bichhoo ke dank kaise sahun ga Ya Rasul Allah

Yahan ma'mooli garmi bhi sahi jaati nahin mujh se

To garmi hashr ki kaise sahun ga Ya Rasul Allah

Zameen tapti hui aag aaftaab barsa raha hoga

Barahna-pa khada kaise rahun ga Ya Rasul Allah

Sar-e-mahshar bala ki dhoop hai Aaqa karam kar do

Main kya mahroom kausar se rahun ga Ya Rasul Allah

Gunahon ke khule daftar khada hun aah! meezaan par

Nahin hain nekiyan ab kya karun ga Ya Rasul Allah

Hai sar pe baar-e-isyan pul-siraat ab paar ho kaise!

Sanbhaalo warna dozakh mein giroon ga Ya Rasul Allah

Baroze hashr gar chashm-e-karam mujh par na ki tum ne

Main jaa kar kis ke daaman mein chhupun ga Ya Rasul Allah

Main mujrim hun jahannam mein agar phenka gaya mujh ko

Halaakat hogi haaye! kya karun ga Ya Rasul Allah

Lapak kar aag ke shole lipat-te hon ge barbaadi

Karam kar do yeh sab kaise sahun ga Ya Rasul Allah

Andheri aag hogi roshni na naam ko hogi

Karam kar do yeh sab kaise sahun ga Ya Rasul Allah

Wahan kaanon mein, aankhon mein, dahan mein, pet mein bhi aag!

Karam kar do yeh sab kaise sahun ga Ya Rasul Allah

Pahaad aagon ke hon ge waadiyan bhi aag ki hongi

Karam kar do yeh sab kaise sahun ga Ya Rasul Allah

Farishte daant-te hon ge hathode maarte hon ge

Karam kar do yeh sab kaise sahun ga Ya Rasul Allah

Wahan saanp aur bichhoo bhi musalsal das rahe hon ge

Karam kar do yeh sab kaise sahun ga Ya Rasul Allah

Ghiza dozakh ki thohar aur oopar khaulta paani

Karam kar do yeh sab kaise sahun ga Ya Rasul Allah

Na maange maut aaye gi na behoshi hi chhaaye gi

Karam kar do yeh sab kaise sahun ga Ya Rasul Allah

Jo tum chaaho ge to hongi meri sab mushkilein aasaan

Wa-garna naar mein, main jaa padoon ga Ya Rasul Allah

Tumhara hun ghulam aur hai ghulami par mujhe to naaz

Karam se saath jannat mein chaloon ga Ya Rasul Allah

Zaban par hoga us dam Ya Rasul Allah ka naara

Baroze hashr jis dam main utthun ga Ya Rasul Allah

Gham-e-ummat mein rota dekh kar tum ko sar-e-mahshar

Shaha! qaabu mein kaise dil rakhoon ga Ya Rasul Allah

Suno ya mat suno main to pukaare jaaun ga tum ko

Jahan mein jab talak Aaqa jeeyun ga Ya Rasul Allah

Karam farma ke ho Attar bhi is qaul ka misdaaq

"Teri khaatir jeeyun ga aur marun ga" Ya Rasul Allah