واہ! کیا بات ہے مدینے کی

Shah tum ne Madina apnaya, wah! kya baat hai Madine ki

Apna rauza isi mein banwaya, wah! kya baat hai Madine ki

Mujrimon ko bhi Taiba bulwaya, wah! kya baat hai Madine ki

Raasta maghfirat ka dikhlaya, wah! kya baat hai Madine ki

Har taraf rahmaton ka hai saaya, wah! kya baat hai Madine ki

Khoob rutba azeem hai paaya, wah! kya baat hai Madine ki

Koi deewana jab Madine mein, aaya dil us ka jhooma seene mein

Lab pe be-saakhta hai yeh aaya, wah! kya baat hai Madine ki

Allah Allah! Gumbad-e-Khazra aur mehraab-o-minbar-e-Aqa

Husn mein chaand un se sharmaya, wah! kya baat hai Madine ki

Khoob duniya ke hain haseen baghaat aur phoolon ke husn ki kya baat

Dil ko par dasht-e-Taiba hi bhaaya, wah! kya baat hai Madine ki

Bagh-e-Taiba ka husn kya kehna, jaama-e-noor jaise ho pehna

Husn saara yaheen simat aaya, wah! kya baat hai Madine ki

Khoob soorat wahan ke sab kohsar aur hain dhool ke haseen anbaar

Waadiyon par bhi noor ka saaya, wah! kya baat hai Madine ki

Husn-e-Paris pe marne waale kya! dasht-e-Taiba ka husn bhi dekha?

Bol utthega Madine gar aaya, wah! kya baat hai Madine ki

Jis ne husn-e-aqeedat apnaai, us ne amraaz se shifa paai

Jaa ke jo khaak-e-Taiba mal aaya, wah! kya baat hai Madine ki

Jo museebat ka aa gaya maara, door gham us ka ho gaya saara

Khil uttha jo ke dil tha murjhaya, wah! kya baat hai Madine ki

Jo sawaali Madine aaya hai, jholiyan bhar ke apni laaya hai

Koi khaali na laut kar aaya, wah! kya baat hai Madine ki

Mere Aqa Madine jab aaye, bachiyon ne taraane the gaaye

Chaar soo khoob kaif tha chhaaya, wah! kya baat hai Madine ki

Qalb-e-aashiq ne kaif paaya hai, rooh ko bhi suroor aaya hai

Lab pe naam-e-Madina jab aaya, wah! kya baat hai Madine ki

Shauq-e-Taiba mein dil sulagta hai, hum ko achha Madina lagta hai

Yaad-e-Taiba hamara sarmaya, wah! kya baat hai Madine ki

Zaair-e-rauza ko shafaat ki, Ya Nabi aap ne bashaarat di

Ba-muqaddar hai dar pe jo aaya, wah! kya baat hai Madine ki

Kab talak dar-ba-dar phire Aqa! apne kooche mein maut de Aqa!

Yeh gada dar pe arz hai laaya! wah! kya baat hai Madine ki

Khud ko jo ishq mein rulaata hai, la-jaram woh sukoon paata hai

Us ke ashk aakhirat ka sarmaya, wah! kya baat hai Madine ki

Har taraf bheeni bheeni hai khushbu, soz hi soz har jagah har soo

Farsh taa arsh noor hai chhaaya, wah! kya baat hai Madine ki

Bas Madina Madina wird-e-lab, kaash! aksar rahe mere Ya Rabb

Dil ko naam-e-Madina hai bhaaya, wah! kya baat hai Madine ki

Apne Attar ko Shah-e-Aalam, de do bahr-e-Bilal apna gham

Koi duniya ka do na sarmaya, wah! kya baat hai Madine ki