ضیاء پیر و مرشد

Zia peer-o-murshid mere rehnuma hain

Suroor-e-dil-o-jaan mere dilruba hain

Kali hain gulistan-e-Ghaus-ul-Wara ki

Yeh baagh-e-Raza ke gul-e-khushnuma hain

Shariat tariqat ho ke ma'rifat ho

Yeh haq hai haqeeqat mein haq aashna hain

Sahaare hain be-kas ke dukhiyon ke waali

Sakha ke hain makhzan to kaan-e-ata hain

Khuda ki mohabbat se sarshaar hain woh

Dil-o-jaan se Mustafa par fida hain

Mila sabz gumbad ka qismat se saaya

Diyar-e-Muhammad mein jalwa numa hain

Bula lo mujhe apne qadmon mein ab to

Yeh ayyam-e-furqat bare jaanguda hain

Mujhe roo-e-zeba zara phir dikha do

Ziyarat ke lamhe bare jaanfaza hain

Tasawwur jamaaoon to maujood paaoon

Karoon band aankhein to jalwa numa hain

Na kyun Ahl-e-Sunnat karein naaz un par

Ke woh naib-e-Ghaus-o-Ahmad Raza hain

Munawwar karein qalb-e-Attar ko bhi

Shaha! aap deen-e-mubeen ki zia hain