رونق کل اولیا یا غوث اعظم دستگیر

Raunaq-e-kull auliya Ya Ghaus-e-Azam Dastgeer

Peshwa-e-asfiya Ya Ghaus-e-Azam Dastgeer

Aap hain peeron ke peer aur aap hain raushan zameer

Aap Shah-e-atqiya Ya Ghaus-e-Azam Dastgeer

Auliya ki gardanein hain aap ke zer-e-qadam

Ya Imam-al-Auliya Ya Ghaus-e-Azam Dastgeer

Thartharaate hain sabhi jinnat tere naam se

Hai tera woh dabdaba Ya Ghaus-e-Azam Dastgeer

Paida hote hi mah-e-Ramzan mein roze rakhe

Doodh din mein na piya, Ya Ghaus-e-Azam Dastgeer

Jis tarah murde jilaaye is tarah murshid mere

Murda dil ko bhi jila, Ya Ghaus-e-Azam Dastgeer

Ahl-e-mahshar dekhte hi hashr mein yoon bol uthe

Marhaba sad marhaba Ya Ghaus-e-Azam Dastgeer

Aap jaisa peer hote kya gharaz dar dar phiroon

Aap se sab kuchh mila Ya Ghaus-e-Azam Dastgeer

Go zaleel-o-khwaar hoon badkaar-o-badkardaar hoon

Aap ka hoon aap ka Ya Ghaus-e-Azam Dastgeer

Raasta pur-khaar, manzil door, man sunsaan hai

Al-madad ae rehnuma! Ya Ghaus-e-Azam Dastgeer

Ghaus-e-Azam! aaiye meri madad ke waaste

Dushmanon mein hoon ghira Ya Ghaus-e-Azam Dastgeer

Aafatein bhi door hon, ranj-o-bala kaafoor hon

Bahr-e-Shah-e-Karbala Ya Ghaus-e-Azam Dastgeer

Izn do Baghdad ka har ek aqeedat-mand ko

Gyaarahween waale piya Ya Ghaus-e-Azam Dastgeer

Meethe murshid haaziri ko ik zamaana ho gaya

Dar pe phir mujh ko bula, Ya Ghaus-e-Azam Dastgeer

Mere meethe meethe murshid aaiye na khwaab mein

Waasta Sarkar ka, Ya Ghaus-e-Azam Dastgeer

Apni ulfat ki pila kar mai mujhe Ya Murshidi

Mast aur be-khud bana Ya Ghaus-e-Azam Dastgeer

Lamha lamha barh raha hai haaye! issyaan ka maraz

Deejiye mujh ko shifa Ya Ghaus-e-Azam Dastgeer

Murshidi mujh ko bana de tu mareez-e-Mustafa

Az paye Ahmad Raza, Ya Ghaus-e-Azam Dastgeer

Apne Rabb se Mustafa ka gham dila de murshidi

Haath utha ke kar dua Ya Ghaus-e-Azam Dastgeer

Ab sarhaane aao murshid aur mujhe kalma parhao

Dam labon par aa gaya Ya Ghaus-e-Azam Dastgeer

Hai yahi Attar ki haajat Madine mein mare

Ho karam bahr-e-Ziya Ya Ghaus-e-Azam Dastgeer