یارب! پھر اوج پر یہ ہمارا نصیب ہو

Ya Rab! phir auj par yeh hamara naseeb ho

Soo-e-Madina phir hamain jaana naseeb ho

Makka bhi ho naseeb Madina naseeb ho

Dasht-e-Arab naseeb ho sehra naseeb ho

Hajj ka safar phir ae mere Maula naseeb ho

Arafat ka Mina ka nazaara naseeb ho

Ya Rab! Rasool-e-Paak ka jalwa naseeb ho

Phir dekhna woh Gumbad-e-Khizra naseeb ho

Choomoon Arab ki vaadiyan ae kaash! jaa ke phir

Sehra mein un ke ghoomna phirna naseeb ho

Kaabay ke jalwon se dil-e-muztar ho kaash! shaad

Lutf-e-tawaaf-e-Khaana-e-Kaaba naseeb ho

Makkay mein un ki jaa-e-wiladat pe Ya Khuda

Phir chashm-e-ashkbaar jamaana naseeb ho

Kis tarah shauq se wahan kartay thay hum tawaaf

Phir gird-e-Kaaba jhoom ke phirna naseeb ho

Jaa kar ke khoob lotain Madine ki khaak par

Aankhon mein khaak-e-Taiba lagaana naseeb ho

Sad aafreen Gumbad-e-Khizra ki taabishain

Jalwon mein is ke khud ko gumaana naseeb ho

Waan chalchalaati dhoop ka bhi ik suroor hai

Jootay utaar kar wahan chalna naseeb ho

Namnaak aankh Gumbad-e-Khizra ko choom lay

Jhuk jaaye phir adab se woh lamha naseeb ho

Kar doon main kaash! jaaliyon par apni jaan fida

Rauzay ka un ke jis ghari jalwa naseeb ho

Mehraab-o-mimbar aur woh hariyaali jaaliyan

Aur masjid-e-Habib ka jalwa naseeb ho

Jannat ki pyari kyaari ki theen khoob ronaqain

Phir baithna wahan pe Khudaya naseeb ho

Chhup chhup ke dekhoon mimbar-e-aqdas ki phir bahaar

Shayad kabhi to Shah ka jalwa naseeb ho

Detay thay jis jagah pe azaan Hazrat-e-Bilal

Us jaa ko door door se takna naseeb ho

Hijr-e-Rasool mein hamain Ya Rab paye Raza

Ae kaash! phoot phoot ke rona naseeb ho

Attar ki ho haaziri har saal Ya Khuda

Aakhir ko Taiba mein isay marna naseeb ho