حبّ دنیا سے تو بچا یارب

Hubb-e-dunya se tu bacha Ya Rab

Aashiq-e-Mustafa bana Ya Rab

Kar de hajj ka sharaf ata Ya Rab

Sabz gumbad bhi de dikha Ya Rab

Yeh teri hi to hai inaayat ke

Mujh ko Makkay bula liya Ya Rab

Aaj hai roo-ba-roo mere Kaaba

Silsila hai tawaaf ka Ya Rab

Ab barsa de noor ka ke loon

Baarish-e-noor mein naha Ya Rab

Kaash lab par mere rahay jaari

Zikr aathon pehar tera Ya Rab

Chashm-e-tar aur qalb-e-muztar de

Apni ulfat ki mai pila Ya Rab

Aah! tughyaniyaan gunahon ki

Paar naiyya meri laga Ya Rab

Nafs-o-shaitaan ho gaye ghaalib

Un ke changul se tu chhura Ya Rab

Kar ke tauba main phir gunahon mein

Ho hi jaata hoon mubtala Ya Rab

Neem-jaan kar diya gunahon ne

Maraz-e-isyaan se de shifa Ya Rab

Kis ke dar par main jaaoon ga Maula

Gar tu naaraaz ho gaya Ya Rab

Waqt-e-rehlat ab aagaya Maula

Jalwa-e-Mustafa dikha Ya Rab

Qabr mein aah! ghup andhera hai

Roshni ho paye Raza Ya Rab

Saanp liptain na mere laashay se

Qabr mein kuch na de saza Ya Rab

Noor-e-Ahmad se qabr roshan ho

Wehshat-e-qabr se bacha Ya Rab

Haaye! husn-e-amal nahi pallay

Hashr mein mera hoga kya Ya Rab

Garmi-e-hashr, pyaas ki shiddat

Jaam-e-Kausar mujhe pila Ya Rab

Khauf aata hai naar-e-dozakh se

Ho karam behr-e-Mustafa Ya Rab

Mera naazuk badan jahannam se

Bahr-e-Ghaus-o-Raza bacha Ya Rab

Taalib-e-maghfirat hoon ya Allah

Bakhsh de behr-e-Murtaza Ya Rab

Sab ne thukra diya to kya parwa

Mujh ko tera hai aasra Ya Rab

Zulf-e-mahboob ka bana qaidi

Aur hargiz na phir chhura Ya Rab

Mushkilon mein de sabr ki taufeeq

Apne gham mein faqat ghula Ya Rab

De de soz-e-Bilal ya Allah

Ashkbaar aankh ho ata Ya Rab

Aah! a'ada hain khoon ke pyaasay

Dushmanon se mujhe bacha Ya Rab

De shahadat mujhe Madine mein

Az paye Shah-e-Karbala Ya Rab

Sabz gumbad ke zer-e-saaya ho

Jaan meri jism se juda Ya Rab

Qabr meri banay Madine mein

Tujh se hai yeh meri dua Ya Rab

Hirs-e-duniya nikaal de dil se

Bas rahoon taalib-e-raza Ya Rab

De de "Qufl-e-Madina" aankhon ka

Bahr-e-Usman-e-Ba-Haya Ya Rab

De de "Qufl-e-Madina" lab ka bhi

Bahr-e-Siddiq-e-Ba-Safa Ya Rab

Kaash! aadat fazool baaton ki

Door ho az paye Raza Ya Rab

Waasta mere peer-o-murshid ka

Mujh ko tu muttaqi bana Ya Rab

Dil ka ujra chaman ho phir aabaad

Koi aisi hawa chala Ya Rab

Har baras kaash! aake Makkay mein

Lutf uthaaoon tawaaf ka Ya Rab

Jis kisi ne kaha, "Dua karna"

Us ka poora ho mudda'a Ya Rab

Kar de jannat mein tu jiwaar un ka

Apne Attar ko ata Ya Rab