مٹا میرے رنج و الم یا الہی

Mita mere ranj-o-alam Ya Ilahi

Ata kar mujhe apna gham Ya Ilahi

Sharaab-e-mohabbat kuch aisi pila de

Kabhi bhi nasha ho na kam Ya Ilahi

Mujhe apna aashiq bana kar bana de

Tu sartaapa tasweer-e-gham Ya Ilahi

Faqat tera taalib hoon hargiz nahi hoon

Talabgaar-e-jaah-o-hasham Ya Ilahi

Na de taaj-e-shahi na de baadshahi

Bana de gada-e-Haram Ya Ilahi

Jo ishq-e-Muhammad mein aansoo bahaaye

Ata kar de woh chashm-e-nam Ya Ilahi

Sharaf hajj ka de de chalay qaafila phir

Mera kaash! soo-e-Haram Ya Ilahi

Dikha de Madine ki galiyan dikha de

Dikha de Nabi ka Haram Ya Ilahi

Chalay jaan is shaan se kaash yeh sar

Dar-e-Mustafa pe ho kham Ya Ilahi

Mera sabz gumbad ke saaye mein niklay

Muhammad ke qadmon mein dam Ya Ilahi

Ibaadat mein lagta nahi dil hamara

Hain isyaan mein bad-mast hum Ya Ilahi

Mujhe de de imaan par istiqamat

Paye Sayyid-e-Muhtasham Ya Ilahi

Mere sar pe isyaan ka baar aah Maula!

Barha jaata hai dam-ba-dam Ya Ilahi

Zameen bojh se mere phatti nahi hai

Yeh tera hi to hai karam Ya Ilahi

Huqooq-ul-Ibaad! aah! hoga mera kya!

Karam mujh pe kar de karam Ya Ilahi

Bari koshishain keen gunah chhorne ki

Rahay aah! nakaam hum Ya Ilahi

Mujhe sachhi tauba ki taufeeq de de

Paye Taajdaar-e-Haram Ya Ilahi

Jo naaraaz tu ho gaya to kahin ka

Rahoon ga na teri qasam Ya Ilahi

Mujhe naar-e-dozakh se darr lag raha hai

Ho mujh naatwaan par karam Ya Ilahi

Sada ke liye hoja raazi Khudaya

Hamesha ho lutf-o-karam Ya Ilahi

Khudaya buray khaatmay se bachana

Parhoon kalma jab niklay dam Ya Ilahi

Gunahon se bharpoor naama hai mera

Mujhe bakhsh de kar karam Ya Ilahi

Tulain mere a'amaal meezaan pe jis dam

Paray ik bhi naiki na kam Ya Ilahi

Main tha laaiq-e-naar-e-dozakh Khudaya

Di jannat hai kitna karam Ya Ilahi

Buroz-e-qayamat ho aisi inaayat

Rahoon pul pe saabit qadam Ya Ilahi

Jala de na mujh ko kahin naar-e-dozakh

Karam behr-e-Shah-e-Umam Ya Ilahi

Gunahon ki aadat barhi ja rahi hai

Karam Ya Ilahi karam Ya Ilahi

Gunahon ki taareekiyan chha gayi hain

Karam Ya Ilahi karam Ya Ilahi

Chalay qabr mein sab akela lita kar

Karam Ya Ilahi karam Ya Ilahi

Nakeerain bhi qabr mein aachukay hain

Karam Ya Ilahi karam Ya Ilahi

Qayamat ki garmi mein kaisay sahoon ga

Karam Ya Ilahi karam Ya Ilahi

Yahood-o-Nasaara ko maghloob kar de

Ho khatm un ka jaur-o-sitam Ya Ilahi

Mujhe donon aalam ki khushiyan ata hon

Mita de zamanay ke gham Ya Ilahi

Jo beemaar aaye shifa paake jaaye

Sikha de mujhe aisa dam Ya Ilahi

Main tehreer se deen ka danka bajaoon

Ata kar de aisa qalam Ya Ilahi

Tu Attar ko be-sabab bakhsh Maula

Karam kar karam kar karam Ya Ilahi