بلالو پھر مجھے اے شاہ بحروبر مدینے میں

Bula lo phir mujhe ae Shah-e-behro-bar Madine mein

Main phir rota hua aaoon tere dar par Madine mein

Main pohanchoon koo-e-jaanan mein gareebaan chaak seena chaak

Gira de kaash mujh ko shauq tadpa kar Madine mein

Madine jaane waalo jaao jaao fee-amaanillah

Kabhi to apna bhi lag jaayega bistar Madine mein

Salam-e-shauq kehna haajiyo mera bhi ro ro kar

Tumhein aaye nazar jab rauza-e-anwar Madine mein

Payaam-e-shauq lete jaao mera qaafile waalo

Sunana daastan-e-gham meri ro kar Madine mein

Mera gham bhi to dekho main pada hun door Taiba se

Sukoon paayega bas mera dil-e-muztar Madine mein

Na ho mayoos deewano pukaare jaao tum un ko

Bulaayein ge tumhein bhi ek din Sarwar Madine mein

Bula lo hum ghareebon ko bula lo Ya Rasul Allah

Paye Shabbeer-o-Shabbar Fatima Haider Madine mein

Khudaya waasta deta hun mere Ghaus-e-Azam ka

Dikha de Sabz Gumbad ka haseen manzar Madine mein

Waseela tujh ko Bubakr-o-Umar, Usman-o-Haider ka

Ilahi tu ata kar de hamein bhi ghar Madine mein

Madine jab main pohanchoon kaash aisa kaif taari ho

Ke rote rote gir jaaoon main ghash khaa kar Madine mein

Niqaab-e-rukh ulat jaaye tera jalwa nazar aaye

Jab aaye kaash! tera saail-e-be-par Madine mein

Jo teri deed ho jaaye to meri Eid ho jaaye

Gham apna de mujhe eidi mein bulwa kar Madine mein

Madine joon hi pohancha ashk jaari ho gaye mere

Dam-e-rukhsat bhi roya hichkiyan bhar kar Madine mein

Madine ki judai aashiqon pe shaaq hoti hai

Woh rote hain tadap kar hichkiyan bhar kar Madine mein

Kaheen bhi soz hai duniya ke gulzaron mein baaghon mein?

Faza pur-kaif hai lo dekh lo aakar Madine mein

Wahan ik saans mil jaaye yehi hai zeest ka haasil

Woh qismat ka dhani hai jo gaya dam bhar Madine mein

Madina Jannat-ul-Firdaus se bhi hai fizoon-tar ke

Rasool-e-Paak ka hai rauza-e-anwar Madine mein

Chalo chaukhat pe un ki rakh ke sar qurbaan ho jaayein

Hayaat-e-jaawadani paayeinge mar kar Madine mein

Madina mera seena ho mera seena Madina ho

Madina dil ke andar ho dil-e-muztar Madine mein

Paye neki ki dawat tu jidhar rakkhe magar ae kaash!

Main khwabon mein pohanchta hi rahoon aksar Madine mein

Na daulat de na sarwat de mujhe bas yeh saadat de

Tere qadmon mein mar jaaoon main ro ro kar Madine mein

Ata kar do ata kar do Baqee-e-paak mein madfan

Meri ban jaaye turbat Ya Shah-e-Kausar Madine mein

Madina is liye Attar jaan-o-dil se hai pyaara

Ke rehte hain mere Aqa mere dilbar Madine mein