ہم پہ نظر کرم تاجدار حرم

Hum pe nazr-e-karam, Tajdaar-e-Haram

Nek ban jaayein hum, Tajdaar-e-Haram

Dard-e-isyan mite, aadat-e-bad choote

Shah-e-Arab-o-Ajam, Tajdaar-e-Haram

Nafs-o-shaitaan ka, aah! ghalba hua

Ya Nabi ho karam, Tajdaar-e-Haram

Yaksaan hon madh-o-zam mujh ko kar do karam

Na khushi ho na gham, Tajdaar-e-Haram

Bad-kalaami na ho, yaawa-goyi na ho

Bolun main kam se kam, Tajdaar-e-Haram

Rakkhoon neechi nazar, na idhar na udhar

Dekhun ho yeh karam, Tajdaar-e-Haram

Ashkbaari karun, aah-o-zaari karun

Ho nigaah-e-karam, Tajdaar-e-Haram

Husn-e-akhlaaq do, bahr-e-Khallaaq do

Ho nigaah-e-karam, Tajdaar-e-Haram

Khoob mukhlis banun, main riya se bachun

Ho nigaah-e-karam, Tajdaar-e-Haram

Aafatein jaayein tal, mushkilein bhi hon hal

Kar do aisa karam, Tajdaar-e-Haram

Hon Durood-o-Salam, mere lab par mudaam

Har ghadi dam-ba-dam, Tajdaar-e-Haram

Bad-khasaail talein, seedhe raste chalein

Kar do Aaqa karam, Tajdaar-e-Haram

Ho gaya gar azaab, ae Risaalat-ma'aab

Sah sakein ge na hum, Tajdaar-e-Haram

Maghfirat ki sanad, dee-do bahr-e-Samad

Ya Shafi-ul-Umam, Tajdaar-e-Haram

Roz-e-mahshar shaha! mujh gunahgaar ka

Aap rakhna bharam, Tajdaar-e-Haram

Zaahir-o-baatin ek, Aaqa ho kar do nek

Bahr-e-murshid karam, Tajdaar-e-Haram

Apna deewana kar, mast-o-mastana kar

Shehryaar-e-Iram, Tajdaar-e-Haram

Ab Madine bula, Sabz Gumbad dikha

Choomun khaak-e-haram, Tajdaar-e-Haram

Sabr-o-himmat mile, yoon shahadat mile

Mera sar ho qalam, Tajdaar-e-Haram

Kaash aaye woh pal, rote rote nikal

Jaa-ye qadmon mein dam, Tajdaar-e-Haram

Kaash! hota shaha, jism Attar ka

Khaak-e-Taybah mein zam, Tajdaar-e-Haram