مدینے کا ٹکٹ مجھ کو عطا داتا پیا

Ho Madine ka ticket mujh ko ata Data Piya

Aap ko Khawaja Piya ka waasta Data Piya

Mujh ko Ramzan-e-Madina ki ziyaarat ho naseeb

Kharch ho raah-e-Madina ka ata Data Piya

Do na do marzi tumhaari tum Madine ka ticket

Main pukaare jaaonga Data Piya Data Piya

Daulat-e-dunya ka saail ban ke main aaya nahin

Mujh ko deewaana Madine ka bana Data Piya

Kaash main roya karoon ishq-e-Rasool-e-paak mein

Aisa aashiq do bana bahr-e-Raza Data Piya

Gham mujhe meethe Madine ka ata kar do Shaha

Mera seena bhi Madina do bana Data Piya

Meethe meethe Mustafa ki baargaah-e-paak mein

Keejiye meri sifaarish aap Ya Data Piya

Go zaleel-o-khwaar hoon main paapi-o-badkaar hoon

Aap ka hoon aap ka hoon aap ka Data Piya

Aarzoo hai maut aaye Gumbad-e-Khazra tale

Haath utha kar keejiye Haq se dua Data Piya

Main gunaahon ka mareez aur tum tabeeb-e-aasiyaan

Ho ilaaj ab bahr-e-Haq beemaar ka Data Piya

Aap ki chashm-e-karam ho jaaye gar bad-haal par

Door ho gham ki abhi kaali ghata Data Piya

Kya gharaz dar dar phiroon main bheek lene ke liye

Hai salaamat aastaana aap ka Data Piya

Jholiyan bhar bhar ke le jaate hain mangte raat din

Ho meri umeed ka gulshan hara Data Piya

Mujh ko Data taajdaaraan-e-jahaan se kya gharaz

Main to hoon mangta tere darbaar ka Data Piya

Ujre ghar aabaad hon aur gham ke maare shaad hon

Ho tere har ek mangta ka bhala Data Piya

Dum daba kar bhaag jaaye sher bhi gar dekh le

Aap ke darbaar ka kutta Shaha Data Piya

Kaash! phir Lahore mein neki ki da'wat aam ho

Faiz ka darya baha do sarwara Data Piya

Masjidein aabaad hon aur sunnatein bhi aam hon!

Faiz ka darya baha do sarwara Data Piya

Saare mangte apne chehre par sajaayein daarhiyaan

Faiz ka darya baha do sarwara Data Piya

Takht-e-shaahi ki nahin hai aarzoo Attar ko

Is ko bas kutta bana lo apna Ya Data Piya