ہو بغداد کا پھر سفر غوث اعظم

Ho Baghdad ka phir safar Ghaus-e-Azam

Muhayya wasaail woh kar Ghaus-e-Azam

Shehenshah-e-jinn-o-bashar Ghaus-e-Azam

Ho waliyon ke bhi taajwar Ghaus-e-Azam

Main pehle bhi Baghdad haazir hua tha

Ijaazat do baar-e-digar Ghaus-e-Azam

Main galiyon mein bistar jama doon phir aa kar

Do Baghdad mein mujh ko ghar Ghaus-e-Azam

Dikha do mazaar-e-munawwar ke jalwe

Dikha do phir apna nagar Ghaus-e-Azam

Khuda-o-Nabi ki jo ulfat mein roye

Ata kar do woh chashm-e-tar Ghaus-e-Azam

Do khauf-e-Khuda bahr-e-Siddiq-o-Farooq

Do ishq-e-Shah-e-bahrobar Ghaus-e-Azam

Mere meethe murshid mujhe phir sharaf de

Yeh sar ho tera sang-e-dar Ghaus-e-Azam

Mila silsila Qaadiri fazl-e-Rabb se

Main hoon kis qadar bakhtawar Ghaus-e-Azam

Hamesha tera ishq be-chain rakhe

Ata ho woh soz-e-jigar Ghaus-e-Azam

Mujhe apni ulfat ki khairaat de do

Meri khaali jholi do bhar Ghaus-e-Azam

Meri doobti naao ko do sahaara

Zara jald aao idhar Ghaus-e-Azam

Yahaan bhi sahaara wahaan bhi sahaara

Idhar Ghaus-e-Azam udhar Ghaus-e-Azam

Mujhe dushmanon ne kaheen ka na chhora

Hai faryaad! tooti kamar Ghaus-e-Azam

Adoo ke muqaabil woh himmat ata ho

Rahoon kaash! seena-sipar Ghaus-e-Azam

Madad al-madad murshidi warna dushman

Chala jaan se maar kar Ghaus-e-Azam

Zabaan par rahe meri Ya Peer-o-Murshid

Tera zikr aathon pehar Ghaus-e-Azam

Mera hubb-e-dunya se peechha chhora de

Ata apni ulfat to kar Ghaus-e-Azam

Shaha nafs-e-ammaara maghloob ho ab

Ho shaitaan ka door shar Ghaus-e-Azam

Hai issyaan ke beemaar ka dam labon par

Khudaara lo jaldi khabar Ghaus-e-Azam

Tumhein mere haalaat ki sab khabar hai

Pareshaan hoon main kis qadar Ghaus-e-Azam

Shaha! kaash qufl-e-Madina laga loon

Zabaan par bhi aur aankh par Ghaus-e-Azam

Bayaan sun ke tauba gunahgaar kar lein

Zabaan mein woh de do asar Ghaus-e-Azam

Main Baghdad ka koi sag hota aur kaash!

Mujhe rakhte tum baandh kar Ghaus-e-Azam

Shaheed-e-Madina ho Attar aasi

Muraad is ki yeh aaye bar Ghaus-e-Azam