ہیں صف آرا سب حور و ملک

Hain saf-aara sab hoor-o-malak aur ghilmaan khuld sajaate hain

Ik dhoom hai Arsh-e-Aazam par mehmaan Khuda ke aate hain

Hai aaj falak raushan raushan, hain taare bhi jagmag jagmag

Mehboob Khuda ke aate hain mehboob Khuda ke aate hain

Qurbaan main shaan-o-azmat par soye hain chain se bistar par

Jibreel-e-Ameen haazir ho kar Meraj ka muzhda sunaate hain

Jibreel buraaq saja kar ke Firdaus-e-Bareen se le aaye

Baaraat farishton ki aayi Meraj ko dulha jaate hain

Hai khuld ka joda zeb-e-badan rahmat ka saja sehra sar par

Kya khoob suhana hai manzar Meraj ko dulha jaate hain

Hai khoob fiza mahki mahki chalti hai hawa thandi thandi

Har samt samaan hai noorani Meraj ko dulha jaate hain

Yeh izz-o-jalaal Allah Allah! yeh auj-o-kamaal Allah Allah!

Yeh husn-o-jamaal Allah Allah! Meraj ko dulha jaate hain

Deewano! tasawwur mein dekho! Asra ke dulha ka jalwa

Jhurmat mein malaaik le kar unhein Meraj ka dulha banaate hain

Aqsa mein sawari jab pahunchi Jibreel ne badh ke kahi takbeer

Nabiyon ki imamat ab badh kar Sultan-e-Jahan farmaate hain

Woh kaisa haseen manzar hoga jab dulha bana Sarwar hoga

Ushaaq tasawwur kar kar ke bas rote hi rah jaate hain

Yeh Shah ne paayi sa'adat hai Khaaliq ne ata ki ziyarat hai

Jab ek tajalli padti hai Moosa to ghash kha jaate hain

Jibreel thehar kar Sidra par bole jo badhe hum ek qadam

Jal jaayein ge saare baal-o-par ab hum to yahin rah jaate hain

Allah ki rahmat se dilbar jaa pahunche dana ki manzil par

Allah ka jalwa bhi dekha deedaar ki lazzat paate hain

Meraj ki shab to yaad rakkha phir hashr mein kaise bhoolein ge

Attar isi umeed pe hum din apne guzaare jaate hain