میرے میٹھے مدینے کی کیا بات ہے

Zarre zarre pe chhaaya hua noor hai, mere meethe Madine ki kya baat hai

Noor se sab faza is ki mamoor hai, mere meethe Madine ki kya baat hai

Noor phoolon mein hai noor kaliyon mein hai, aur bazaar mein noor galiyon mein hai

Dasht-o-kohsar par noor hi noor hai, mere meethe Madine ki kya baat hai

Har taraf rahmaton ki hai chhaayi ghata, mehki mehki hai kya khoob Madani faza

Zarre zarre pe qurbaan yahan Toor hai, mere meethe Madine ki kya baat hai

Kya bayan dasht-e-Taiba ki hon khoobiyan, phool to phool kaante bhi dilkash yahan

Patte patte pe chhaaya hua noor hai, mere meethe Madine ki kya baat hai

Kaif-o-masti mein doobe hue raat din, bheeni khushbu se mehke hue raat din

Jis ko dekho yahan aake masroor hai, mere meethe Madine ki kya baat hai

Bagh-e-Taiba mein rehti hai har dam bahaar, aa ke dekho yahan ka samaan khushgawar

Sab faza is ki khushbu se bharpoor hai, mere meethe Madine ki kya baat hai

Ghamzada jo bhi darbaar mein aa gaya, Shah ki woh nigah-e-karam paa gaya

Saara ranj-o-alam is ka kafoor hai, mere meethe Madine ki kya baat hai

Yeh Madine hi ko to fazeelat mili, ke isi mein bana hai mazaar-e-Nabi

Gumbad-e-Sabz har aankh ka noor hai, mere meethe Madine ki kya baat hai

Sabz Gumbad ke jalwon pe qurbaan jaan, balke qurbaan hai husn-e-kawn-o-makaan

Har minaare pe chhaaya hua noor hai, mere meethe Madine ki kya baat hai

Khaak-e-Taiba mein rakkhi hai Rabb ne shifa, saari beemariyon ki hai is mein dawa

Is ki barkat se har ik maraz door hai, mere meethe Madine ki kya baat hai

Aas mujh ko tumhare karam ki shaha, bheek de do mujhe apne gham ki shaha!

Keh do Aqa! teri arz manzoor hai, mere meethe Madine ki kya baat hai

Phir Madine ka rangeen gulzaar hai aur muqaddar se Attar badkaar hai

Garcha naama gunahon se bharpoor hai, mere meethe Madine ki kya baat hai