بلاوا دوبارہ پھر اک بار آئے

Bulaawa dobaara phir ik baar aaye

Madine mein Aaqa! gunahgaar aaye

Mere ashk behne lagein kaash us dam

Nazar joon hi Taybah ka gulzaar aaye

Dil-e-muztarib ki badhe be-qarari

Tadap kar giroon joon hi darbaar aaye

Nigahon mein jachta nahin hai gulistaan

Pasand dil ko sahra-e-Sarkar aaye

Hai apni jagah husn phoolon ka lekin

Pasand dil ko Taybah hi ka khaar aaye

Mahallaat oonche nahin chaahta main

Madine ka qismat mein gehwaar aaye

Aqeedat se sar jhuk gaya us ghadi jab

Nazar Sabz Gumbad ke anwaar aaye

Tere Sabz Gumbad pe jaaye woh qurbaan

Madine mein jo koi ik baar aaye

Tumhari shafa'at ka haqdaar thehre

Jo darbaar mein bakht-e-bedaar aaye

Tere hi karam se hamara bharam hai

Gunahon ka sar pe liye baar aaye

Ata ho sanad maghfirat ki ata ho

Tere dar pe tere gunahgaar aaye

Idhar bhi Maseeha nigaah-e-shifa ho

Tere dar pe isyan ke beemaar aaye

Gunahon ki kasrat se ghabra gaye jab

Woh mahshar mein soo-e-gunahgaar aaye

Huyi qabr raushan hamari usi dam

Liye jab woh chehra chamakdaar aaye

Paye peer-o-murshid humein apna keh do

Yahi aarzoo le ke darbaar aaye

Shaha tujh se tujh hi ko maangein ge hum to

Tere dar pe jis roz Sarkar aaye

Dawa har maraz ki hai khaak-e-Madina

Shifa paaye dar pe jo beemaar aaye

Sar-e-mahshar daaman mein lein ge usey jo

Nidamat se rota gunahgaar aaye

Tere ishq mein aisa ho jaaun be-khud

Kabhi hosh mujh ko na Sarkar aaye

Ishaara mile kaash! jannat ka fauran

Sar-e-mahshar jis dam yeh badkaar aaye

Nigaah-e-karam ho karam Jaan-e-Aalam

Dil-e-gham-zada le ke ghamkhwaar aaye

Sada sunnatein aam karta rahun main

Isi haal mein maut Sarkar aaye

Paye Shah-e-Karb-o-Bala maut mujh ko

Madine ki galiyon mein Sarkar aaye

Sab Islami behnon ko parda ata ho

Na paas un ke Iblees-e-ayyaar aaye

Sab Islami bhai bhi fashion se bhaagein

Shaha! sunnaton par unhein pyaar aaye

Bula lo Madine mein Shah-e-Madina

Tadapta hua kaash! badkaar aaye

Tere gham mein be-haal ho jaaye Aaqa

Palat ke jo Taybah se Attar aaye