آج طیبہ کا ہے سفر آقا

Aaj Taiba ka hai safar Aqa

De do toshe mein chashm-e-tar Aqa

Ghamzada hun main kis qadar Aqa

Tum ko meri hai sab khabar Aqa

Main hun beemar-e-la-dawa Maula

Aap hain mere charagar Aqa

Chand ashkon ke ma-siwa palle

Kuch nahin tosha-e-safar Aqa

Taj-e-shahi ka main, nahin talib

Kar do rahmat ki ik nazar Aqa

Teri ulfat ka main bhikari hun

Mera kashkol jaaye bhar Aqa

Qalb-e-muztar do chashm-e-tar do aur

Chaak seena tapan jigar Aqa

"Chal Madina" ka woh bhi lein muzhda

Jin ke palle nahin hai zar Aqa

Kya imamay ki ho bayan azmat

Teri naalein taj-e-sar Aqa

Tere hote hue bhala kyun ho

Waar dushman ka kargar Aqa

Is tarah se chhipa lo daaman mein

Na adoo ki pade nazar Aqa

Motarif hun gunah karne mein

Koi chhodi nahin kasar Aqa

Phans gaya hun gunah ke daldal mein

Ho karam Shah-e-behro-bar Aqa

Main gunahgar hun magar qurbaan

Teri rahmat ki hai nazar Aqa

Waasta mere Ghaus-e-Azam ka

Har khata kar do darguzar Aqa

Tum usey bhi gale lagate ho

Jis ko dhutkaare har bashar Aqa

Main jahannam mein gir gaya hota

Na bachaate mujhe agar Aqa

Kaash! neechi nazar rahe, be-kaar

Main na dekhoon idhar udhar Aqa

Jaan chhoote fuzool baaton se

Bahr-e-Siddiq aur Umar Aqa

Bahr-e-Usman-o-Murtaza Maula

Istiqaamat do deen par Aqa

Az paye murshidi Ziauddin

Mere dil mein banao ghar Aqa

Kaash! is shaan se yeh dam nikle

Teri dehleez pe ho sar Aqa

Izn de do Baqee-e-Gharqad ka

Tere jalwon mein jaaoon mar Aqa

Kya banega bajaye Taiba ke

Sindh mein mar gaya agar Aqa

Maut Attar ko Madine mein

Aaye ab to na jaaye ghar Aqa