اللہ اللہ ترا دربار رسول عربی

Allah Allah tera darbaar Rasul-e-Arabi

Tera darbaar karam-baar Rasul-e-Arabi

Be-kason ke ho madadgaar Rasul-e-Arabi

Ghamzadon ke bhi ho ghamkhwaar Rasul-e-Arabi

Kul khudaai ke ho mukhtaar Rasul-e-Arabi

Tum rasoolon ke bhi sardar Rasul-e-Arabi

Ik nazar ya Shah-e-Abrar Rasul-e-Arabi

Bas tera hi rahoon beemar Rasul-e-Arabi

Phir dikha do mujhe ik baar Rasul-e-Arabi

Tum Madine ka woh gulzaar Rasul-e-Arabi

Saamne hon tere meenaar Rasul-e-Arabi

Gumbad-e-sabz ke anwaar Rasul-e-Arabi

Tera sehra, tera kohsaar Rasul-e-Arabi

Aur ho yeh tera badkaar Rasul-e-Arabi

Teri deewaar ko choomoon tera darwaza bhi

Dhool bhi phool bhi aur khaar Rasul-e-Arabi

Joon hi rota hua aaoon main tere rauze par

Kaash! usi aan ho deedaar Rasul-e-Arabi

Koi khaali nahi lauta kabhi dar se Aaqa

Hai sakhi Aap ka darbaar Rasul-e-Arabi

Koi daulat, koi sarwat, koi shohrat chaahe

Main faqat tera talabgaar Rasul-e-Arabi

Aatish-e-ishq bhadakti hi rahe seene mein

Bas tadapta rahoon sarkar! Rasul-e-Arabi

Aap ke hijr ka gham kaash rulaaye mujh ko

Khoon rota rahoon sarkar! Rasul-e-Arabi

Ho 'Madina hi Madina' mere lab par ae kaash

Har ghadi ho yahi takraar Rasul-e-Arabi

Mujh ko deewaana bana bahr-e-Bilal-e-Habashi

Mere dilbar mere dildaar Rasul-e-Arabi

Tere darbaar-e-guhar-baar ke sab saail hain

Aghniya hon ke hon naadaar Rasul-e-Arabi

Tere deewane tadapte hain Madine ke liye

Woh bhi dekhein tera darbaar Rasul-e-Arabi

Door sunnat se Musalman hue jaate hain

Aah! fashion ki hai yalghaar Rasul-e-Arabi

Sunnaton ka ho ata dard Musalmanon ko

Door fashion ki ho bharmaar Rasul-e-Arabi

Mera seena teri sunnat ka Madina ban jaaye

Sunnaton ka karoon parchaar Rasul-e-Arabi

Jaam-e-deedaar pila do mere Aaqa! ab to

Aankh hai kab se talabgaar Rasul-e-Arabi

Mushkilein meri hon aasaan baraaye murshid

Mere sarwar, mere sardar Rasul-e-Arabi

Waasta Ghaus-o-Raza ka sar-e-baaleen aa ja

Jaan ba-lab hai tera beemar Rasul-e-Arabi

Muskuraate hue ushshaq chale dunya se

Qabr mein hoga jo deedaar Rasul-e-Arabi

Hubb-e-dunya mein giraftaar hai nafs-e-zaalim

Al-madad ya Shah-e-Abrar! Rasul-e-Arabi

Dil pe shaitaan ne Aaqa hai jamaya qabza

Hun gunahon mein giraftaar Rasul-e-Arabi

Aah! badhta hi chala jaata hai maraz-e-isyaan

Do shifa Sayyid-e-Abrar Rasul-e-Arabi

Main gunahgaar, siyah-kaar-o-khata-kaar sahi

Par hun kis ka? tera sarkar Rasul-e-Arabi

Meri har khaslat-e-bad door ho jaan-e-aalam!

Naik ban jaaoon main sarkar, Rasul-e-Arabi

Garmi-e-hashr se be-taab hun Shah-e-Kausar

Ho nazar soo-e-gunahgaar Rasul-e-Arabi

Ab to sarkar! ho Attar pe nazar-e-rahmat

Keh do apna sag-e-darbaar Rasul-e-Arabi