میرے آقا کا سخی دربار ہے

Maang lo jo kuch tumhein darkaar hai

Mere Aqa ka sakhi darbaar hai

Haazir-e-darbaar hun mere tabeeb

Dard-e-isyan ki dawa darkaar hai

Kasrat-e-khanda se dil murda hua

Tujh se faryaad ae Shah-e-Abraar hai

Qahqaha tum mat lagao bhaiyo!

Gar lihaaz-e-girya-e-sarkar hai

Zikr-e-Haq mein lab ko bas mashghool rakh

Rahat-e-dil gar tujhe darkaar hai

Dijiye "Qufl-e-Madina" yeh ghulam

Aah! bad-atwaar-o-bad-guftaar hai

Umr ghatt-ti jaa rahi hai aah! nafs!

Garm isyan ka magar bazaar hai

Des ka gor-e-ghariban aah! aah!

Maut Taiba ki mujhe darkaar hai

Laaj rakhna hashr mein badkar ki

Tera banda hai go bad-atwaar hai

Jankani ka waqt hai Ya Mustafa

Jaan ba-lab ab talib-e-deedar hai

Aap ke qadmon mein gir kar maut ki

Aarzu derina ae dildar hai

Maghfirat farma de bahr-e-murshidi

Yeh dua tujh se mere Ghaffar hai

Bulbulo! tum ko mubarak phool ho

Bas gaya Taiba ka dil mein khaar hai

Kya karun main dekh kar rang-e-chaman

Dasht-e-Taiba se mujhe to pyaar hai

Sabz Gumbad ki ziyaein marhaba

Marhaba pur-noor har meenar hai

Jagmagaata hai Madina raat din

Sabz Gumbad manba-e-anwaar hai

Jis ki turbat hai Baqee-e-paak mein

Us ko haasil qurbat-e-sarkar hai

Mustafa is roz aaye is liye

Eid-e-Milad-un-Nabi se pyaar hai

Marhaba! Aqa ki aamad marhaba!

Hum ko is naare se behad pyaar hai

Jo koi gustakh hai sarkar ka

Woh hamesha ke liye fin-naar hai

Dushmanon ka tang ghera ho gaya

Rehm ki darkhwast ab sarkar hai

Aah! dushman khoon ka pyasa hua

Ya Nabi! teri madad darkaar hai

Haasidon ko de hidayat Ya Khuda

Us ka sadqa jo mera dildaar hai

Ghaus ke daaman mein Attar aa gaya

Do jahan mein is ka beda paar hai