یقیناً منبعِ خوفِ خدا صدیقِ اکبر ہیں

Yaqeenan manba-e-khauf-e-Khuda Siddiq-e-Akbar hain

Haqeeqi aashiq-e-Khair-ul-Wara Siddiq-e-Akbar hain

Bila-shak paikar-e-sabr-o-raza Siddiq-e-Akbar hain

Yaqeenan makhzan-e-sidq-o-wafa Siddiq-e-Akbar hain

Nihaayat muttaqi-o-paarsa Siddiq-e-Akbar hain

Taqi hain balke Shah-e-atqiya Siddiq-e-Akbar hain

Jo yaar-e-ghaar-e-Mahboob-e-Khuda Siddiq-e-Akbar hain

Wahi yaar-e-mazaar-e-Mustafa Siddiq-e-Akbar hain

Tabeeb-e-har mareez-e-laadawa Siddiq-e-Akbar hain

Ghareebon be-kason ka aasra Siddiq-e-Akbar hain

Ameer-ul-Momineen mein aap Imaam-ul-Muslimeen hain aap

Nabi ne jannati jin ko kaha Siddiq-e-Akbar hain

Sabhi as-haab se barh kar muqarrab zaat hai un ki

Rafeeq-e-Sarwar-e-arz-o-sama Siddiq-e-Akbar hain

Umar se bhi woh afzal hain woh Usman se bhi aala hain

Yaqeenan peshwa-e-Murtaza Siddiq-e-Akbar hain

Imaam Ahmad-o-Maalik, Imaam-e-Bu Haneefa aur

Imaam Shaafi'ee ke peshwa Siddiq-e-Akbar hain

Tamaami auliya-Allah ke sardaar hain jo us

Hamaare Ghaus ke bhi peshwa Siddiq-e-Akbar hain

Sabhi ulama-e-ummat ke, imaam-o-peshwa hain aap

Bila-shak peshwa-e-asfiya Siddiq-e-Akbar hain

Khuda-e-paak ki rahmat se insaanon mein har ek se

Fazoon-tar ba'd az kul ambiya Siddiq-e-Akbar hain

Halaakat-khez tughyaani ho ya hon maujein toofaani

Kyun doobe apna bera naakhuda Siddiq-e-Akbar hain

Bhatak sakte nahin hum apni manzil thokaron mein hai

Nabi ka hai karam aur rehnuma Siddiq-e-Akbar hain

Gunaahon ke maraz ne neem-jaan hai kar diya mujh ko

Tabeeb ab bas mere to aap Ya Siddiq-e-Akbar hain

Na ghabraao gunahgaaro tumhaare hashr mein haami

Muhibb-e-Shaafi-e-roz-e-jaza Siddiq-e-Akbar hain

Na dar Attar aafat se Khuda ki khaas rahmat se

Nabi waali tere, mushkil-kusha Siddiq-e-Akbar hain