یا خدا تجھ سے میری دُعا ہے

Sar hai kham haath mera utha hai

Ya Khuda tujh se meri dua hai

Tujh se fazl ki reham ki iltija hai

Ya Khuda tujh se meri dua hai

Qalb mein yaad lab par sana hai

Mere har dard ki yeh dawa hai

Kaun dukhiyon ka tere siwa hai

Ya Khuda tujh se meri dua hai

Qalb sakhti mein hadd se barha hai

Banda taalib teray khauf ka hai

Iltija-e-gham-e-Mustafa hai

Ya Khuda tujh se meri dua hai

Hubb-e-dunya mein dil phans gaya hai

Nafs-e-badkaar haavi hua hai

Haaye shaitaan bhi peechhay para hai

Ya Khuda tujh se meri dua hai

Aah! banda dukhon mein ghira hai

Is ko tera hi bas aasra hai

Iltija-e-karam Ya Khuda hai

Ya Khuda tujh se meri dua hai

Tera in'aam hai Ya Ilahi

Kaisa ikraam hai Ya Ilahi

Haath mein daaman-e-Mustafa hai

Ya Khuda tujh se meri dua hai

Ishq de soz de chashm-e-nam de

Mujh ko meethe Madine ka gham de

Waasta Gumbad-e-Sabz ka hai

Ya Khuda tujh se meri dua hai

Har gunah se bacha mujh ko Maula

Naik khaslat bana mujh ko Maula

Tujh ko Ramazan ka waasta hai

Ya Khuda tujh se meri dua hai

Fazl kar reham kar tu ata kar

Aur muaf ae Khuda har khata kar

Waasta Panjtan Paak ka hai

Ya Khuda tujh se meri dua hai

Afw-o-rehmat ka bakhshish ka saail

Hoon nihayat gunahgaar-o-ghaafil

Mera sab haal tujh par khula hai

Ya Khuda tujh se meri dua hai

Hoon ba-zahir bara naik-soorat

Kar bhi de mujh ko ab naik-seerat

Zahir achha hai baatin bura hai

Ya Khuda tujh se meri dua hai

Be-sabab ae Khuda kar de bakhshish

Hashr mein mujh se karna na pursish

Ghaffar Maula naam tera hai

Ya Khuda tujh se meri dua hai

Mujh khata-kaar par bhi ata kar

Be-hisaab bakhsh de Rabb-e-Akbar

Mujh ko dozakh se darr lag raha hai

Ya Khuda tujh se meri dua hai

Naza'a mein Rabb-e-Ghaffar tujh se

Maut se qabl beemaar tujh se

Taalib-e-jalwa-e-Mustafa hai

Ya Khuda tujh se meri dua hai

Qabr mein mujh ko tanha lita kar

Chal diye haaye saaray biradar

Dil andheray mein ghabra raha hai

Ya Khuda tujh se meri dua hai

Maghfirat ka hoon tujh se sawaali

Pherna apne dar se na khaali

Mujh gunahgaar ki iltija hai

Ya Khuda tujh se meri dua hai

Mere murshid jo Ghaus-ul-Wara hain

Shah Ahmad Raza rehnuma hain

Tera lutf teri ata hai

Ya Khuda tujh se meri dua hai

Naar-e-dozakh se mujh ko amaan de

Bahr-e-Hasnain baagh-e-jinaan de

Kar de rehmat meri iltija hai

Ya Khuda tujh se meri dua hai

Waasta tujh ko pyare Nabi ka

Aur ashaab-o-aal-e-Nabi ka

Bakhsh de mujh ko yeh iltija hai

Ya Khuda tujh se meri dua hai

Ya Khuda maah-e-Ramzan ke sadqay

Sachhi tauba ki taufeeq de de

Naik ban jaaoon jee chahta hai

Ya Khuda tujh se meri dua hai

Dard-e-isyaan mita Ya Ilahi

De de kaamil shifa Ya Ilahi

Tujh se beemaar ki iltija hai

Ya Khuda tujh se meri dua hai

Jo hain beemaar sehat ke taalib

Un pe farma karam Rabb-e-Ghaalib

Tujh se reham-o-karam ki dua hai

Ya Khuda tujh se meri dua hai

Main ne maana ke sab se bura hoon

Kis ka hoon? tera hoon main tera hoon

Naaz rehmat pe mujh ko bara hai

Ya Khuda tujh se meri dua hai

Aib dunya mein tu ne chhupaye

Hashr mein bhi na ab aanch aaye

Aah! naama mera khul raha hai

Ya Khuda tujh se meri dua hai

Umr badiyon mein saari guzaari

Haaye! phir bhi nahi sharmsaari

Bakhsh mahboob ka waasta hai

Ya Khuda tujh se meri dua hai

Wird-e-lab kalma-e-tayyiba ho aur

Imaan par khaatma ho

Aagaya haaye! waqt-e-qaza hai

Ya Khuda tujh se meri dua hai

Ya Khuda aisay asbaab paaoon

Kaash Makkay Madine mein jaaoon

Mujh ko armaan hajj ka bara hai

Ya Khuda tujh se meri dua hai

Aah! ranj-o-alam ne hai maara

Ya Ilahi mujhe de sahara

Aik ghamgeen dil ki sada hai

Ya Khuda tujh se meri dua hai

Meri jaan aafaton se chhurana

Mozi amraaz se bhi bachana

Tujh ko Siddiq ka waasta hai

Ya Khuda tujh se meri dua hai

Tu ata hilm ki bheek kar de

Mere akhlaaq bhi theek kar de

Tujh ko Farooq ka waasta hai

Ya Khuda tujh se meri dua hai

Go yeh banda nikamma hai bekaar

Is se le fazl se Rabb-e-Ghaffar

Kaam woh jis mein teri raza hai

Ya Khuda tujh se meri dua hai

Teray pyare ki dukhiyari ummat

Par hai sailaab ki aayi aafat

Reham kar bas tera aasra hai

Ya Khuda tujh se meri dua hai

Har taraf se balaon ne ghera

Aafaton ne lagaya hai dera

Tu hi ab mera haajat-rawa hai

Ya Khuda tujh se meri dua hai

Us ki jholi muraadon se bhar de

Us ke haq mein jo behtar ho kar de

Jis ne mujh se dua ka kaha hai

Ya Khuda tujh se meri dua hai

Ishq-e-Ahmad mein aansoo bahaaoon

Hubb-e-dunya se khud ko bachaoon

Aisi taufeeq de iltija hai

Ya Khuda tujh se meri dua hai

Meri dushman se farma hifazat

Deen-o-imaan bhi rakhna salamat

Dast-basta meri iltija hai

Ya Khuda tujh se meri dua hai

Meherbaan tu hi, tu hi madadgaar

Us dukhi dil ka tu haami-o-kaarsaaz

Jis ko dunya ne thukra diya hai

Ya Khuda tujh se meri dua hai

Sakht goyi ki mit jaaye khaslat

Narm goyi ki par jaaye aadat

Waasta khulq-e-mahboob ka hai

Ya Khuda tujh se meri dua hai

Sunnaton ki karoon khoob khidmat

Har kisi ko doon naiki ki dawat

Naik main bhi banoon iltija hai

Ya Khuda tujh se meri dua hai

Qaaflon mein safar ki ho kasrat

Hum se yoon deen ki le le khidmat

Aajizaana Ilahi dua hai

Ya Khuda tujh se meri dua hai

Meri bak bak ki aadat mita de

Aur aankhain haya se jhuka de

Sadqa Usman ka jo ba-haya hai

Ya Khuda tujh se meri dua hai

Ya Ilahi kar aisi inaayat

De de imaan par istiqamat

Tujh se Attar ki iltija hai

Ya Khuda tujh se meri dua hai