اللہ مجھے حافظ قرآن بنادے

Allah! mujhe Hafiz-e-Quran bana de

Quran ke ehkaam pe bhi mujh ko chala de

Ho jaaya karay yaad sabaq jald Ilahi!

Maula tu mera hafiza mazboot bana de

Susti ho meri door uthoon jald sawairay

Tu madrasay mein dil mera Allah! laga de

Ho madrasay ka mujh se na nuqsaan kabhi bhi

Allah! yahan ke mujhe aadaab sikha de

Chhutti na karoon bhool ke bhi madrasay ki main

Auqaat ka bhi mujh ko tu paaband bana de

Ustaad hon maujood ya baahar kahin masroof

Aadat tu meri shor machaanay ki mita de

Khaslat ho meri door sharaarat ki Ilahi!

Sanjeeda bana de mujhe sanjeeda bana de

Ustaad ki karta rahoon har dam main itaa'at

Maan baap ki izzat ki bhi taufeeq Khuda de

Kapray main rakhoon saaf tu dil ko mere kar saaf

Maula tu Madina mere seenay ko bana de

Filmon se dramon se de nafrat tu Ilahi!

Bas shauq mujhe naat-o-tilawat ka Khuda de

Main saath jamaat ke parhoon saari namazain

Allah! ibaadat mein mere dil ko laga de

Parhta rahoon kasrat se durood un pe sadayeen

Aur zikr ka bhi shauq paye Ghaus-o-Raza de

Har kaam shariat ke mutabiq main karoon kaash!

Ya Rab tu muballigh mujhe sunnat ka bana de

Main jhoot na boloon kabhi gaali na nikaaloon

Allah! maraz se tu gunahon ke shifa de

Main faaltu baaton se rahoon door hamesha

Chup rehnay ka Allah! saleeqa tu sikha de

Akhlaaq hon achhay mera kirdaar ho suthra

Mahboob ka sadqa tu mujhe naik bana de

Ustaad hon, maan baap hon, Attar bhi ho saath

Yoon hajj ko chalain aur Madina bhi dikha de