سارے نبیوں کا سرور مدینے میں ہے

Saare nabiyon ka Sarwar Madine mein hai

Sab rasoolon ka afsar Madine mein hai

Lutf jannat se barh kar Madine mein hai

Meethe Mehboob ka ghar Madine mein hai

Kya hawa bhi mu'attar Madine mein hai

Sab faza bhi munawwar Madine mein hai

Kar ke hijrat yahan aa gaye Mustafa

Roshni aaj ghar ghar Madine mein hai

Jaante ho Madina hai kyon dil pasand

Donon aalam ka dilbar Madine mein hai

Saare deewane betaab hain is liye

Shah ki qabr-e-anwar Madine mein hai

Noor ki dekho barsaat hai chaar soo

Kya samaa kaif-aawar Madine mein hai

Hijr-o-furqat ke beemaar ko le chalo

Rahat-e-jaan-e-muztar Madine mein hai

Door reh kar ke weeran hai zindagi

Maut bhi kaif-aawar Madine mein hai

Hai Madine ka rutba bara khuld se

Kyon keh Mehboob-e-Daawar Madine mein hai

Maaldaaro! na itraao tum maal par

Un ka mangta tawangar Madine mein hai

Apni manzil ko paa loge aa jaao tum

Bhoole bhatkon ka rehbar Madine mein hai

Bhool jaaoge Paris ki sab raunaqein

Wo samaa rooh-parwar Madine mein hai

Dushmano! mat akela samajhna mujhe

Mera haami-o-yaawar Madine mein hai

Aao isyaan-shi'aaro naha lo yahan

Rahmato'n ka samundar Madine mein hai

Hashr mein jaam-e-Kausar ki hai gar talab

Aao Saaqi-e-Kausar Madine mein hai

Aao aao gunahgaaro! aa jaao tum

Shaafi-e-roz-e-mahshar Madine mein hai

Ae shafa'at ke umeedwaaro! chalo!

Shaafi-e-roz-e-mahshar Madine mein hai

Tum shafa'at mein shak mat karo zaairo!

Shaafi-e-roz-e-mahshar Madine mein hai

"Chal Madina" wahi ho sake jis ka dil

Ghar mein reh kar bhi aksar Madine mein hai

"Chal Madina" ka deewano! muzhda suno

Jald har ba-muqaddar Madine mein hai

Sabz Gumbad ka Attar manzar to dekh

Kis qadar kaif-aawar Madine mein hai