مجھ کو درپیش ہے پھر مُبارک سفر

Mujh ko darpesh hai phir mubaarak safar

Qaafile ab Madine ka tayyaar hai

Nekiyon ka nahi koi tosha faqat

Meri jholi mein ashkon ka ik haar hai

Koi sajdon ki saugaat hai na koi

Zuhd-o-taqwa mere paas sarkar hai

Chal pada hun Madine ki jaanib magar

Haaye sar par gunahon ka anbaar hai

Jurm-o-isyaan pe apne lajaata hua

Aur ashk-e-nadaamat bahaata hua

Teri rahmat pe nazrein jamaata hua

Dar pe haazir yeh tera gunahgaar hai

Tera saani kahan! Shah-e-kaun-o-makaan

Mujh sa aasi bhi ummat mein hoga kahan!

Tere afw-o-karam ka Shah-e-do-jahan!

Kya koi mujh se badh kar bhi haqdaar hai?

Ya Nabi! Tujh pe laakhon durood-o-salaam

Mujh ko hai naaz ke main hun tera ghulam

Apni rahmat se Tu Shah-e-Khair-ul-Anaam

Mujh se aasi ka bhi naaz-bardaar hai

Mujrimon ko shaha! bakhshwaata hai Tu

Apni ummat ki bigdi banaata hai Tu

Gham ke maaron ko seene lagaata hai Tu

Ghamzadon be-kason ka Tu ghamkhwaar hai

Sarwar-e-anbiya rahmat-e-do-sara

Tu hi mushkil-kusha Tu hi haajat-rawa

Jab bhi sar par mere koi tooti bala

Izn-e-Rabb se Tu mera madadgaar hai

Zair-e-jism-e-mubarak kabhi boriya

Haath takiya hai bistar kabhi khaak ka

Jaan-o-dil saadgi pe hon us ki fida

Jo ke saare rasoolon ka sardar hai

Do tadapne ka Aaqa qareena mujhe

De do khasta jigar chaak seena mujhe

Chashm-e-tar de do Shah-e-Madina mujhe

Tere gham ka yeh banda talabgaar hai

Thokrein dar-ba-dar kab talak khaaoon main

Phir Madine muqaddar se jab aaoon main

Kaash! qadmon mein sarkar mar jaaoon main

Ya Nabi! yeh tamanna-e-badkaar hai

Sunnatein Mustafa ki tu apnaaye ja

Deen ko khoob mehnat se phailaaye ja

Yeh wasiyyat tu Attar pohonchaaye ja

Us ko jo un ke gham ka talabgaar hai