مبارک ہو حبیب رب اکبر آنے والا ہے

Mubarak ho Habeeb-e-Rabb-e-Akbar aane wala hai

Mubarak! ambiya ka aaj afsar aane wala hai

Andheron mein bhatakte phirne waalon ko mubarak ho

Tumhein Haq se milaane aaj rahbar aane wala hai

Mubarak bad-naseebon ko mubarak ho ghareebon ko

Jahan mein be-bason ka saaya-gustar aane wala hai

Gunaahgaaro na ghabraao siyah-kaaro na gham khaaon

Suno muzhda Shafee-e-Roz-e-Mahshar aane wala hai

Liye parcham utar aaye hain Jibreel aasmaan se aaj

Jahan mein Aamina Bi Bi ka dilbar aane wala hai

Karo ghar ghar charaaghaan sabz parcham aaj lehraao

Machao marhaba ki dhoom dilbar aane wala hai

Agar na aaj jhoomo ge to kab jhoomo ge deewaano!

Machal jaao tumhaara aaj yaawar aane wala hai

Taraawat kyun na ho haasil mere qalb-o-jigar ko aaj

Jahan mein bahr-e-rahmat ka shanaawar aane wala hai

Dil-e-ghamgeen ko mil jaayega saamaan raahat ka

Suroor-e-dil, qaraar-e-jaan-e-muzttar aane wala hai

Jo hai sardaar, aalam ke sabhi sajda-guzaaron ka

Khuda ka aaj woh sachha shanaagar aane wala hai

Mubarak gham ke maaro! gham ghalat ho jaayenge saare

Habeeb-e-Haq madaawa gham ka le kar aane wala hai

Jahan mein zulmaton ka chaak hoga aaj se seena

Khuda ke fazl se mah-e-munawwar aane wala hai

Bihamdillah imaan ab to mera le nahin sakta

Are chal bhaag shaitaan mera yaawar aane wala hai

Khabar hai abr-e-rahmat aaj kyun dunya pe chhaaye hain?

Jahan mein rahmaton ka aaj paikar aane wala hai

Mubarak ho Haleema Sa'diya tujh ko mubarak ho

Teri godi mein kul aalam ka Sarwar aane wala hai

Utho ta'zeem ki khaatir ke ghar mein Aamina ke ab

Wilaadat ka woh lamha kaif-aawar aane wala hai

Uthaao sabz parcham aur chalo sab Aamina ke ghar

Lutaane rahmatain Haq ka Payambar aane wala hai

Tasalli to rakho sairaab bhi ho jaao ge Attar

Chalakta jaam le kar Shah-e-Kausar aane wala hai