مرے تم خواب میں آؤ مرے گھر روشنی ہوگی

Mere tum khwaab mein aao mere ghar roshni hogi

Meri qismat jaga jaao inaayat yeh badi hogi

Madine mujh ko aana hai gham-e-furqat mitaana hai

Kab Aaqaa-e-Madina dar pe meri haaziri hogi

Shehanshah-e-Madina do tadapne ka qareena do

Woh aankh Aaqa inaayat ho ke jo ashqon bhari hogi

Banaalo apna deewana banaalo apna mastana

Khazaane mein tumhare kya kami pyaare Nabi hogi

Gham-e-doori rulaata hai Madina yaad aata hai

Tasalli rakh ae deewane teri bhi haaziri hogi

Mujhe gar deed ho jaaye to meri Eid ho jaaye

Tera deedaar jab hoga mujhe haasil khushi hogi

Khazaan ka sakht pehra hai ghamon ka ghup andhera hai

Zara sa muskura do ge to dil mein roshni hogi

Ilahi! Gumbad-e-Khazra ke saaye mein shahadat de

Meri laash un ke qadmon mein na jaane kab padi hogi

Humein bhi izn mil jaaye shaha qadmon mein aane ka

Na jaane kab Madine mein hamari haaziri hogi

Madina mera ho maskan Baqee-e-Paak ho madfan

Meri umeed ki kheti na jaane kab hari hogi

Tadap kar gham ke maaro tum pukaaro Ya Rasul Allah

Tumhari har moseebat dekhna dam mein tali hogi

Agar woh chaand se chehre ko chamkaate huye aaye

Ghamon ki shaam bhi subah-e-bahaaraan ban gayi hogi

Farishte aa chuke sar par bacha lo Shafi-e-Mahshar

Chhupa daaman mein lo Sarwar saza warna kadi hogi

Gunahon par nidamat hai aur umeed-e-shafa'at hai

Karam hoga rihaayi naar-e-dozakh se jabhi hogi

Sar-e-mahshar woh jis dam jalwa-e-zeba dikhaayein ge

To har soo marhaba Ya Mustafa ki dhoom machi hogi

Woh jaam-e-kausar apne haath se bhar kar pilaayein ge

Karam se door mahshar mein hamari tishnagi hogi

Main ban jaaun sarapa "Madani In'aamaat" ki tasweer

Banun ga nek Ya Allah agar rahmat teri hogi

Rahun har dam musafir kaash "Madani Qaafilon" ka main

Karam ho jaaye Maula gar! inaayat yeh badi hogi

Zaban ka, aankh ka aur pet ka qufl-e-Madina tum

Laga lo warna mahshar mein pashemaani badi hogi

Mujhe jalwa dikha dena mujhe kalma padha dena

Ajal jis waqt sar par Ya Nabi mere khadi hogi

Andhera ghup andhera hai shaha wehshat ka dera hai

Karam se qabr mein tum aao ge to roshni hogi

Mere marqad mein jab Attar woh tashreef laayein ge

Labon pe na'at-e-Shah-e-Anbiya us dam saji hogi