بہت رنجیدہ و غمگین ہے دل یا رسول الله

Bohat ranjeeda-o-ghamgeen hai dil Ya Rasul Allah

Karam kar do kali dil ki utthe khil Ya Rasul Allah

Balaon ne mujhe har samt se kuch aisa ghera hai

Mere badhte hi jaate hain masaail Ya Rasul Allah

Paye imdaad Hamza ko shaha tegh-ba-kaf bhejo

Mere peechhe pada hai haaye! qaatil Ya Rasul Allah

Dil-e-maghmoom ka sab haal Aaqa tum pe zaahir hai

Shaha! hun marham-e-taskeen ka saail Ya Rasul Allah

Gham-o-aalaam ka maara hun Aaqa be-sahara hun

Meri aasaan ho har ek mushkil Ya Rasul Allah

Tumhein deta hun Maula waasta main chaar yaaron ka

Mere ho jaayein tai mushkil maraahil Ya Rasul Allah

Jo tu chaahe to mere gham ki bedi gir pade kat kar

Nahin tere liye yeh koi mushkil Ya Rasul Allah

Musalman aah! ghaafil ho gaye Neki Ki Dawat se

Badha jaata hai haaye! zor-e-baatil Ya Rasul Allah

Shaha mandala rahi hai maut sar par phir bhi mera nafs

Gunahon ki taraf har dam hai maa'il Ya Rasul Allah

Badha jaata hai har dam aah! ghalba nafs-o-shaitaan ka

Yeh har neki mein ho jaate hain haa'il Ya Rasul Allah

Gunahon ke sabhi amraaz Aaqa door farma do

Sanwar jaayein mere sab bad-khasaail Ya Rasul Allah

Na London ki na Paris ki na America ki hai khwahish

Madina hi hamari to hai manzil Ya Rasul Allah

Shafa'at hashr mein farmao ge jab khush-naseebon ki

Mujhe kar lena Aaqa un mein shaamil Ya Rasul Allah

Karam kar do bajuz isyan nahin hai kuch bhi naame mein

Ibadat hai na palle hain nawaafil Ya Rasul Allah

Hamare zakhm haaye gham Rasool-e-Paak bhar jaayein

Jigar ho tere gham mein kaash! ghaayal Ya Rasul Allah

Kuch aisi aag ulfat ki laga do mere seene mein

Main tadpun khoob tadpun misl-e-bismil Ya Rasul Allah

Tere akhlaaq par qurbaan tere ausaaf par waari

Musalman kya adoo bhi tera qaail Ya Rasul Allah

Shaha! jab khuld mein aap aage aage jaayein is dam kaash

Main bhi ho jaaun peechhe peechhe daakhil Ya Rasul Allah

Abhi ban jaaye bigdi tere ik adna ishaare se

Tere Attar ke hal hon masaail Ya Rasul Allah