مدنی مدینے والے

Mujhe dar pe phir bulaana Madani Madine waale

May-e-ishq bhi pilaana Madani Madine waale

Meri aankh mein samaana Madani Madine waale

Bane dil tera thikaana Madani Madine waale

Teri jabke deed hogi jabhi meri Eid hogi

Mere khwaab mein tu aana Madani Madine waale

Mujhe gham sata rahe hain meri jaan kha rahe hain

Tumhein hausla badhaana Madani Madine waale

Mere sab azeez chootein mere dost bhi go roothein

Shaha tum na rooth jaana Madani Madine waale

Main agarcha hun kameena tera hun Shah-e-Madina

Mujhe qadmon se lagaana Madani Madine waale

Tere dar se Shah behtar tere aastaan se badh kar

Hai bhala koi thikaana Madani Madine waale

Tera tujh se hun sawaali shaha pherna na khaali

Mujhe apna tu banaana Madani Madine waale

Yeh mareez mar raha hai tere haath mein shifa hai

Ae tabeeb! jald aana Madani Madine waale

Tu hi anbiya ka sarwar tu hi do jahan ka yaawar

Tu hi rahbar-e-zamana Madani Madine waale

Tu hai be-kason ka yaawar ae mere ghareeb parwar

Hai sakhi tera gharaana Madani Madine waale

Tu Khuda ke baad behtar hai sabhi se mere sarwar

Tera Hashmi gharaana Madani Madine waale

Teri farsh par hukoomat teri arsh par hukoomat

Tu shehanshah-e-zamana Madani Madine waale

Tera khulq sab se baala tera husn sab se aala

Fida tujh pe sab zamana Madani Madine waale

Kahun kis se aah! jaa kar sune kaun mere dilbar

Mere dard ka fasaana Madani Madine waale

Ba-ataa-e-Rabb haakim tu hai rizq ka bhi qaasim

Hai tera sab aab-o-daana Madani Madine waale

Main ghareeb be-sahara kahan aur hai guzaara

Mujhe aap hi nibhaana Madani Madine waale

Yeh karam bada karam hai tere haath mein bharam hai

Sar-e-hashr bakhshwaana Madani Madine waale

Kabhi jau ki moti roti to kabhi khajoor paani

Tera aisa saada khaana Madani Madine waale

Hai chataayi ka bichhona kabhi khaak hi pe sona

Kabhi haath ka sarhaana Madani Madine waale

Teri saadgi pe laakhon teri aajizi pe laakhon

Hon salam aajizaana Madani Madine waale

Mere Shah! waqt-e-rukhsat mujhe meetha meetha sharbat

Teri deed ka pilaana Madani Madine waale

Mile naz'a mein bhi raahat rahun qabr mein salamat

Tu azaab se bachaana Madani Madine waale

Ghup andheri qabr mein jab mujhe chhod kar chalein sab

Meri qabr jagmagaana Madani Madine waale

Pas-e-marg Sabz Gumbad ki Huzoor thandi thandi

Mujhe chhaaon mein sulaana Madani Madine waale

Ae Shafi-e-Roz-e-Mahshar! hai gunah ka bojh sar par

Main phansa mujhe bachaana Madani Madine waale

Mere waalidain mahshar mein go bhool jaayein Sarwar

Mujhe tum na bhool jaana Madani Madine waale

Shaha! tishnagi badi hai yahan dhoop bhi kadi hai

Sar-e-Hauz-e-Kausar aana Madani Madine waale

Mujhe aafaton ne ghera hai moseebaton ka dera

Ya Nabi madad ko aana Madani Madine waale

Tere dar ki haaziri ko jo tadap rahe hain un ko

Shaha! jald tu bulaana Madani Madine waale

Koi is taraf bhi phera ho ghamon ka door andhera

Ae sarapa noora aana Madani Madine waale

Koi paaye bakht-war gar hai sharaf shahi se badh kar

Tere na'al-e-paak utthaana Madani Madine waale

Mera seena ho Madina mere dil ka aabgeena

Bhi Madina hi banaana Madani Madine waale

Ae Habib-e-Rabb-e-Baari hai gunah ka bojh bhaari

Tumhein hashr mein chhudana Madani Madine waale

Meri aadatein hon behtar banun sunnaton ka paikar

Mujhe muttaqi banaana Madani Madine waale

Shaha! aisa jazba paaun ke main khoob seekh jaaun

Teri sunnatein sikhaana Madani Madine waale

Tere naam pe ho qurbaan meri jaan, jaan-e-jaanaan

Ho naseeb sar kataana Madani Madine waale

Teri sunnaton pe chal kar meri rooh jab nikal kar

Chale tum gale lagaana Madani Madine waale

Hain muballigh Aaqa jitne karo door un se fitne

Buri maut se bachaana Madani Madine waale

Mere Ghaus ka waseela rahe shaad sab qabeela

Unhein khuld mein basaana Madani Madine waale

Mere jis qadar hain ahbaab unhein kar dein Shah be-taab

Mile ishq ka khazaana Madani Madine waale

Meri aane wali naslein tere ishq hi mein machlein

Unhein nek tu banaana Madani Madine waale

Mile sunnaton ka jazba mere bhai chhodein Maula

Sabhi daadhiyan mundaana Madani Madine waale

Meri jis qadar hain behnein sabhi Madani burqa pehnein

Ho karam Shah-e-Zamana Madani Madine waale

Do jahan ke khazaane diye haath mein Khuda ne

Tera kaam hai lutaana Madani Madine waale

Tere gham mein kaash! Attar rahe har ghadi giraftaar

Gham-e-maal se bachaana Madani Madine waale