خوشا جھومتا جا رہا ہے سفینہ

Khusha jhoomta ja raha hai safeena

Pohonch jaayeinge in shaa Allah Madina

Ab aaya ke ab aaya Jaddah ka saahil

Ab aayega Makka chaleinge Madina

Main Makke mein ja kar karoonga tawaaf aur

Naseeb aab-e-zam-zam mujhe hoga peena

Khudaya Madina nazar aaye joon hi

Tadap kar giroon de de aisa qareena

Na kyun meri qismat pe rashk aaye mujh ko

Kahan woh Madina kahan main kameena

Rahe wird-e-lab kaash! har dam Ilahi

Madina, Madina, Madina, Madina

Nazar-e-noor ki noor-e-Rabb-ul-ula ho

Mere dil ka chamka do maila nageena

Madine ke Waali! karam aisa kar do

Mujhe nafs-o-shaitaan dabaayein kabhi na

Bacha leejiye mujh ko fashion se Aaqa

Ata keejiye sunnaton ka khazeena

Pila do mujhe saaqiya! jaam aisa

Rahoon mast-o-be-khud main Shah-e-Madina

Tere ishq mein kaash! rota rahoon main

Rahe teri ulfat se ma'moor seena

Tu likh de Ilahi! muqaddar mein mere

Madine mein marna Madine mein jeena

Yeh tasleem, umda hai khushboo-e-jannat

Mujhe kaash mil jaaye un ka paseena

Mareez-e-mohabbat ka dam hai labon par

Sarhaane ab aa jaao Shah-e-Madina

Baqee-e-Mubarak mein do gaz zameen do

Khudara karam Tajdaar-e-Madina

Nahi rote ushshaq dunya ki khaatir

Rulaati hai un ko to yaad-e-Madina

Nigahon mein har dam Madina basa ho

Mujhe kaash mil jaaye woh chashm-e-beena

Tadapte hain rote hain deewane tere

Jahan mein jab aata hai Hajj ka maheena

Taraste hain jo deed-e-Taybah ki khaatir

Dikha deejiye na unhein bhi Madina

Pila do humein jaam-e-deedaar saaqi!

Karam tishna-kaamon pe Shah-e-Madina

Bi-izn-illah jareesab khudaai

Hai maikhana tera tera jaam-o-meena

Tumhein ae muballigh! hamari dua hai

Kiye jaao tay tum taraqqi ka zeena

Tadap utthe Aaqa ke deewane Attar

Madine ki jaanib chala jab safeena