حسن مہ گرچہ بہ ہنگام کمال اچھا ہے
Husn-e-Mah Garcha Ba-Hangaam-e-Kamal Achha Hai
حسن مہ گرچہ بہ ہنگام کمال اچھا ہے
اس سے میرا مہہ خورشید جمال اچھا ہے
بوسہ دیتے نہیں اور دل پہ ہے ہر لحظہ نگاہ
جی میں کہتے ہیں کہ مفت آئے تو مال اچھا ہے
اور بازار سے لے آئے اگر ٹوٹ گیا
ساغر جم مرا اچھا سفال اچھا ہے
بے طلب دیں تو مزا اس میں سوا ملتا ہے
وہ گدا جس کو نہ ہو خوئے سوال اچھا ہے
ان کے دیکھے سے جو آ جاتی ہے منہ پر رونق
وہ سمجھتے ہیں کہ بیمار کا حال اچھا ہے
دیکھیے پاتے ہیں عشاق بتوں سے کیا فیض
اک برہمن نے کہا ہے کہ یہ سال اچھا ہے
ہم سخن تیشہ نے فرہاد کو شیریں سے کیا
جس طرح کا کہ کسی میں ہو کمال اچھا ہے
قطرہ دریا میں جو مل جائے تو دریا ہو جائے
کام اچھا ہے وہ جس کا کہ مآل اچھا ہے
خضر سلطاں کو رکھے خالق اکبر سرسبز
شاہ کے باغ میں یہ تازہ نہال اچھا ہے
ہم کو معلوم ہے جنت کی حقیقت لیکن
دل کے خوش رکھنے کو غالبؔ یہ خیال اچھا ہے
Husn-e-mah garcha ba-hangaam-e-kamal achha hai
Is se mera mah-e-khursheed-e-jamal achha hai
Bosa dete nahin aur dil pe hai har lahza nigah
Ji mein kehte hain ke muft aaye to maal achha hai
Aur bazar se le aaye agar toot gaya
Saghar-e-Jam mera achha safal achha hai
Be-talab dein to maza us mein siwa milta hai
Woh gada jis ko na ho khuy-e-sawal achha hai
Un ke dekhe se jo aa jati hai munh par ronaq
Woh samajhte hain ke bimar ka haal achha hai
Dekhiye paate hain ushshaq buton se kya faiz
Ek barahman ne kaha hai ke yeh saal achha hai
Hum-sukhan tisha ne Farhad ko Shireen se kiya
Jis tarah ka ke kisi mein ho kamal achha hai
Qatra darya mein jo mil jaye to darya ho jaye
Kaam achha hai woh jis ka ke maal achha hai
Khizr-e-sultan ko rakhe Khaliq-e-Akbar sarsabz
Shah ke baagh mein yeh taza nihal achha hai
Hum ko maloom hai jannat ki haqeeqat lekin
Dil ke khush rakhne ko Ghalib yeh khayal achha hai
مرزا غالب
مرزا اسد اللہ خان غالب (27 دسمبر 1797ء – 15 فروری 1869ء) اردو اور فارسی زبان کے سب سے بڑے، سب سے زیادہ پڑھے جانے والے اور عہد ساز کلاسیکی شاعر اور نثری ادیب تھے۔...