دیکھنا قسمت کہ آپ اپنے پہ رشک آ جائے ہے
Dekhna Qismat ke Aap Apne pe Rashk Aa Jaye Hai
دیکھنا قسمت کہ آپ اپنے پہ رشک آ جائے ہے
میں اسے دیکھوں بھلا کب مجھ سے دیکھا جائے ہے
ہاتھ دھو دل سے یہی گرمی گر اندیشے میں ہے
آبگینہ تندیٔ صہبا سے پگھلا جائے ہے
غیر کو یا رب وہ کیونکر منع گستاخی کرے
گر حیا بھی اس کو آتی ہے تو شرما جائے ہے
شوق کو یہ لت کہ ہر دم نالہ کھینچے جائیے
دل کی وہ حالت کہ دم لینے سے گھبرا جائے ہے
دور چشم بد تری بزم طرب سے واہ واہ
نغمہ ہو جاتا ہے واں گر نالہ میرا جائے ہے
گرچہ ہے طرز تغافل پردہ دار راز عشق
پر ہم ایسے کھوئے جاتے ہیں کہ وہ پا جائے ہے
اس کی بزم آرائیاں سن کر دل رنجور یاں
مثل نقش مدعائے غیر بیٹھا جائے ہے
ہو کے عاشق وہ پری رخ اور نازک بن گیا
رنگ کھلتا جائے ہے جتنا کہ اڑتا جائے ہے
نقش کو اس کے مصور پر بھی کیا کیا ناز ہیں
کھینچتا ہے جس قدر اتنا ہی کھنچتا جائے ہے
سایہ میرا مجھ سے مثل دود بھاگے ہے اسدؔ
پاس مجھ آتش بجاں کے کس سے ٹھہرا جائے ہے
Dekhna qismat ke aap apne pe rashk aa jaye hai
Main use dekhun bhala kab mujh se dekha jaye hai
Haath dho dil se yehi garmi gar andeshe mein hai
Aabgina tundi-e-sahba se pighla jaye hai
Ghair ko ya Rabb woh kyonkar mana-e-gustakhi kare
Gar haya bhi us ko aati hai to sharma jaye hai
Shauq ko yeh lat ke har dam nala khainche jayiye
Dil ki woh haalat ke dam lene se ghabra jaye hai
Dur chashm-e-bad teri bazm-e-tarab se wah wah
Naghma ho jata hai wan gar nala mera jaye hai
Garcha hai tarz-e-taghaful parda-dar-e-raz-e-ishq
Par hum aise khoye jate hain ke woh pa jaye hai
Us ki bazm-araiyan sun kar dil-e-ranjur yan
Misl-e-naqsh mudda-e-ghair baitha jaye hai
Ho ke aashiq woh pari-rukh aur nazuk ban gaya
Rang khulta jaye hai jitna ke urta jaye hai
Naqsh ko us ke musawwir par bhi kya kya naaz hain
Khainchta hai jis qadar utna hi khanchta jaye hai
Saya mera mujh se misl-e-dud bhage hai Asad
Paas mujh aatish-bajan ke kis se thehra jaye hai
مرزا غالب
مرزا اسد اللہ خان غالب (27 دسمبر 1797ء – 15 فروری 1869ء) اردو اور فارسی زبان کے سب سے بڑے، سب سے زیادہ پڑھے جانے والے اور عہد ساز کلاسیکی شاعر اور نثری ادیب تھے۔...