اے مرے بھائیو سب سنو دھر کے کاں

Ae mere bhaiyo sab suno dhar ke kaan

Aish-o-ishrat ki urr jayein gi dhajjiyan

Aakhirat ki karo jald taiyaariyan

Maut aa kar rahay gi tumhein be-gumaan

Maut ka dekho e'laan karta hua

Soo-e-gor-e-ghariban janaaza chala

Kehta hai, jaam-e-hasti ko jis ne piya

Woh bhi meri tarah qabr mein jaayega

Tum ae boorho suno! nojawano suno

Ae za'eefo suno! pehlwano suno!

Maut ko har ghari sar pe jaano suno

Jald tauba karo meri maano suno!

Jis ne dunya mein khushiyon ka paaya hai ranj

Aur ghaflat se hai har ghari naghma-sanj

Maut ke baad hoga usay sakht ranj

Us ko barzakh mein ranj us ko dozakh mein ranj

Film-beeni ka tum mashghala chhor do

Saaray aalaat-e-lahw-o-la'ib tor do

Bhaiyo! sab gunahon se munh mor do

Naata tum nekiyon hi se bas jor do

Aik din maut aa kar rahay gi zaroor

Mujrimo! sun lo is ko samajhna na door

Baad-e-murdan na pao ge koi suroor

Khaak ho jaayega sab tumhaara ghuroor

Kab talak tum hukoomat pe itrao ge

Kab tak aakhir gharibon ko tarpaao ge

Zaalimo! baad marnay ke pachhtao ge

Yaad rakho! jahannam mein tum jao ge

Jabkeh paik-e-ajal rooh le jaayega

Jism be-jaan tarap kar thehar jaayega

Lehad mein koi teri nahin aaye ga

Tujh ko dafna ke har ik palat jaaye ga

Baadshahon ki bikhri hui haddiyan

Keh rahi hain na banna kabhi hukmraan

Ihtisaab is ka guzray ga tum par garaan

Hashr mein jab keh jao ge mar kar miyan

Maut ka jaanwar ko ho idraak gar

Gosht lehta na khaanay ko paaye bashar

Aajiz insaan se barh liya jaanwar

Maut se aaj hai sar-ba-sar be-khabar

Chhoro aadat gunahon ki jao sudhar

Warna phans jao ge qabr mein sar-ba-sar

Gar azaabon ko dekho ge jao ge dar

Tum batao kahan jao ge bhaag kar

Jo dukanein khiyaanat se chamkayein ge!

Kya unhein zar ke anbaar kaam aayein ge?

Qahr-e-Qahhaar se kya bacha paayein ge?

Ji nahin, naar-e-dozakh mein le jaayein ge

Maal-e-dunya hai donon jahan mein wabaal

Aap daulat ki kasrat ka chhorein khayaal

Qabr mein saath aayega hargiz na maal

Hashr mein zarre zarre ka hoga suwaal

Ghaafilo! qabr mein jis ghari jao ge

Saanp bichhoo jo dekho ge chillaao ge

Sar pachhaaro ge par kuchh na kar paao ge

Be-hadd apnay gunahon pe pachhtao ge

Qabr mein shakl teri bigar jaayegi

Peep mein laash teri latharr jaayegi

Baal jhar jayein ge khaal udhar jaayegi

Keeray par jayein ge na'ash sarr jaayegi

Mat gunahon pe ho bhai be-baak tu

Bhool mat yeh haqeeqat keh hai khaak tu

Thaam le daaman-e-Shah-e-Laulaak tu

Sachhi tauba se ho jaaye ga paak tu

Jo bhi dunya se Aaqa ka gham le gaya

Woh to baazi Khuda ki qasam le gaya

Saath mein Mustafa ka karam le gaya

Khuld ki woh sanad la-jiram le gaya

Jo musalman banda-e-naikokaar hai

Rabb ke mahboob ka aashiq-e-zaar hai

Qabr bhi us ki jannat ka gulzaar hai

Bagh-e-Firdaus ka bhi woh haqdaar hai

Qalb mein jis ke raasikh hai khauf-e-Khuda

Jo muqaddar se hai aashiq-e-Mustafa

Us ko naar-e-jahannam se kya waasta

Martay hi bil-yaqeen soo-e-jannat gaya

Hai amal jis ka har "Madani In'aam" par

"Qaaflon" mein muyassar hai jis ko safar

Jo bhi "Naiki Ki Da'wat" pe baandhay kamar

Us pe chashm-e-karam Ya Shah-e-bahr-o-bar!

Hausla rakh kyun ghabraata Attar hai

Tu ghulam-e-shehanshah-e-abraar hai

Har qadam par Muhammad madadgaar hai

In sha Allah beera tera paar hai

"Qaaflay" ko jo har waqt taiyaar hai

Marhaba us pe Attar ko pyaar hai

Us ke haq mein dua karta Attar hai

Is ko jannat mein saath us ka darkaar hai