اللہ کی رحمت سے پھر عزمِ مدینہ ہے

Allah ki rahmat se phir azm-e-Madina hai

Phir azm-e-Madina hai tayyaar safeena hai

Chand ashk, nadaamat ke hai zaad-e-safar mera

Palle mein ibaadat ka koi na khazeena hai

Go raah-e-Madina par main chal to pada hun par

Afsos saleeqa hai na koi qareena hai

Sadqe mein Muhammad ke de bakhsh isey ya Rabb

Mujrim hai jo aasi hai badkaar-o-kameena hai

Ae noor-e-Khuda aa kar chamka do paye murshid

Sarkar mere dil ka be-noor nageena hai

Jismaani mareezon ko Allah shifa de de

Achha hai faqat woh jo beemar-e-Madina hai

Tum Dawat-e-Islami ko jaante ho kya hai!

Faizaan-e-Madina hai faizaan-e-Madina hai

Sarkar ki sunnat ki tableegh kiye jaao

Jaam Aap ke haathon se gar hashr mein peena hai

Har dam mere honton par bas zikr-e-Madina ho

Yeh meri tamanna ae Sultan-e-Madina hai

Ushshaq tadapte hain yaad-e-Shah-e-Batha mein

Aata hai jahan mein jab bhi Hajj ka maheena hai

Khush-bakht Madine ka deewaana hai ke is ke

Dil mein bhi Madina hai seene mein Madina hai

Gham meethe Madine ka ae kaash! ke mil jaaye

Armaan yahi dil mein ae Shah-e-Madina hai

Tu kar de ata mujh ko roti hui aankhein aur

Gham mein tere Aaqa jo jalta hua seena hai

Afsos maraz badhta jaata hai gunahon ka

Ho nazar-e-shifa arz ae sarkar-e-Madina hai

Dunya ki to kya balke Firdaus ki khushboo se

Badh kar ke bhi khushboo-daar Aaqa ka paseena hai

Rota hua pohoncha tha rota hua lauta tha

Hain wasl ki do ghadiyan phir hijr-e-Madina hai

Daulat ki frawaani hai maangna naadaani

Ke asl mein daulat to ulfat ka khazeena hai

Ushshaq ki nazron mein weeraan gulistaan hain

Dil un ka to shaida-e-sahra-e-Madina hai

Attar ko gar Tu bhi thukra de kahan jaaye

Tera hai yeh tera hai go laakh kameena hai