عاشق مصطفےٰ ضیاء الدین

Aashiq-e-Mustafa Ziauddin

Zaahid-o-paarsa Ziauddin

Dilbar-o-dilruba Ziauddin

Mere dil ki zia, Ziauddin

Tum ko Qutb-e-Madina ya murshid!

Ulama ne kaha Ziauddin

Yeh sharaf kam nahin sharaf ke main

Hoon mureed aap ka Ziauddin

Mujh ko apna banao deewaana

Bahr-e-Ghaus-ul-Wara Ziauddin

Chashm-e-rehmat ba-soo-e-man murshid

Bahr-e-Ahmad Raza Ziauddin

Aisa kar de karam rahein Ya Rabb!

Mujh se raazi sada Ziauddin

Kaise bhatkoonga ke hain mere to

Rehbar-o-rehnuma Ziauddin

Ek muddat se aankh pyaasi hai

Apna jalwa dikha Ziauddin

Maraz-e-isyaan se neem jaan hoon main

Mujh ko de do shifa Ziauddin

Chashm-e-tar aur qalb-e-muzttar do

Bahr-e-Hamza shaha Ziauddin

Meri sab mushkilein hon hal murshid

Mere mushkil kusha Ziauddin

Pawn sau saal tak Madine mein

Tum ne baanti zia, Ziauddin

Jaam-e-ishq-e-Nabi pila aisa

Hosh mein aaoon na Ziauddin

Mere dushman hain khoon ke pyaase

Mujh ko un se bacha Ziauddin

Aah! toofaan mein hai ghiri naiyya

Ae mere naakhuda Ziauddin

Maut aaye mujhe Madine mein

Kar do Haq se dua Ziauddin

Mujh ko de do Baqee-e-Gharqad mein

Apne qadmon mein jaa Ziauddin

Hashr mein dekh kar pukaaroonga

Marhaba marhaba Ziauddin

Mustafa ka paros jannat mein

Mujh ko Haq se dila Ziauddin

Be-amal hi sahi magar Attar

Kis ka hai? aap ka Ziauddin