آہ! ہر لمحہ گناہ کی کثرت و بھرمار ہے

Aah! har lamha gunah ki kasrat-o-bharmaar hai

Ghalba-e-shaitaan hai aur nafs bad-atwaar hai

Mujrimon ke waastay dozakh bhi shola-baar hai

Har gunah qasdan kiya hai is ka bhi iqraar hai

Haaye! na-farmaniyan badkaariyan be-baakiyan

Aah! naamay mein gunahon ki bari bharmaar hai

Chhup ke logon se gunahon ka raha hai silsila

Tere aagay Ya Khuda har jurm ka izhaar hai

Zindagi ki shaam dhalti ja rahi hai haaye nafs!

Garm roz-o-shab gunahon ka hi bas bazaar hai

Ya Khuda rehmat teri haavi hai tere qahr par

Fazl-o-rehmat ke saharay jee raha badkaar hai

Banda-e-badkaar hoon be-hadd zaleel-o-khaar hoon

Maghfirat farma Ilahi! tu bara Ghaffar hai

Maut ke jhatkon pe jhatkay aarahay hain al-madad

Sakht be-chaini ke aalam mein ghira beemaar hai

Ab sar-e-baaleen Khudaara muskuraatay aaiye

Jaan-ba-lab Shah-e-Madina taalib-e-deedaar hai

Ghusl denay ke liye ghassaal bhi ab aachuka

Ghusl-e-mayyat ho raha hai aur kafan tayyar hai

Paani paani se saara jism mera dhul gaya

Naama-e-a'amaal ko bhi ghusl ab darkaar hai

Laad kar kandhon pe ahbaab aah! qabristan chalay

Waastay tadfeen ke gehra garha tayyar hai

Qabr mein mujh ko lita kar aur mitti daal kar

Chal diye saathi na paas ab koi rishtay-daar hai

Khwaab mein bhi aisa andhera kabhi dekha na tha

Jaisa andhera hamari qabr mein Sarkar hai

Ya Rasool Allah aakar qabr roshan keejiye

Zaat beshak aap ki to mamba-e-anwaar hai

Qabr mein Shah-e-Madina aachukay Munkar Nakeer

Karam! Allah ka banda be-kas-o-laachaar hai

Ya Nabi! jannat ki khirki qabr mein khulwa deejiye

Phir to fazl-e-Rabb se apni qabr bhi gulzaar hai

Tu ne dunya mein bhi aibon ko chhupaya Ya Khuda

Hashr mein bhi laaj rakh lena ke tu Sattaar hai

Naikiyan pallay nahi Aaqa shafa'at keejiye

Aap ki nazar-e-karam hogi to beera paar hai

Ya Nabi! Attar ko jannat mein de apna jiwaar

Waasta Siddiq ka jo tera yaar-e-ghaar hai

Kaash! ho aisi Madine mein kabhi to haaziri

Yeh khabar aaye watan mein mar gaya Attar hai