سب پکارو جھوم کر میٹھا مدینہ مرحبا

Sab pukaro jhoom kar meetha Madina marhaba

Jhoom kar lab choom kar meetha Madina marhaba

Dooba rehta hai Madina roshni mein har ghari

Shaam ho ya ho sahar meetha Madina marhaba

Noor barsaate minaare sabz Gumbad ki bahaar

Dil ho roshan dekh kar meetha Madina marhaba

Jaante ho sabz Gumbad kyon haseen hai is qadar

Is mein hai Aaqa ka ghar meetha Madina marhaba

Phool mehke, dhool chamke, khoobsurat har babool

Pur-kashish har ek hajar meetha Madina marhaba

Pau phati tarka hua aur chahchahayein bulbulein

Hai samaa rangeen tar meetha Madina marhaba

Jabkeh chalti hai saba Aaqa ka rauza choom kar

Jhoom uthte hain shajar meetha Madina marhaba

Barq chamki, lehr ubhri, abr barsa aur gaya

Gumbad-e-Khizra nikhar meetha Madina marhaba

Azmatein hain rif'atein hain na'matein hain barkatein

Rahmatein hain har dagar meetha Madina marhaba

Phool to phir phool hain kaante bhi is ke husn mein

Khoob se hain khoob tar meetha Madina marhaba

Sangrezo'n ki chamak ke saamne sab heech hain

Dunyawi la'al-o-guhar meetha Madina marhaba

Hain fazayein khushgawaar is ki hawayein mushkbaar

Hai mu'attar kis qadar meetha Madina marhaba

Hum ko pyaara hai Madina is liye keh rehte hain

Is mein Shah-e-bahro-bar meetha Madina marhaba

Khuld ki rangeeniyan shaadabiyan tasleem hain

Ye sab apni jaa magar meetha Madina marhaba

Noor ki barse phuwaar is mein rahe hardam bahaar

Khoobsurat hai nagar meetha Madina marhaba

Husn-e-Paris ka fidai bhi yahan par jhoom uthe

Sabz Gumbad dekh kar meetha Madina marhaba

Bakriyan to bakriyan, chiriyan bhi is ki mohtaram

Aur kabootar bakhtawar meetha Madina marhaba

Hijr-e-Taiba mein jo rote hain Khudaya ho naseeb

Un ko Taiba ka safar meetha Madina marhaba

Ya Rasul Allah kehte hi taleingi mushkilein

Ghamzado aao idhar meetha Madina marhaba

Raat roshan din munawwar sab samaa pur-noor hai

Dekh lo ahl-e-nazar meetha Madina marhaba

Jhoom kar taare karein deedar-e-Taiba roz aur

Hon fida shams-o-qamar meetha Madina marhaba

Jo Madine aa gaya Attar aakar mar gaya

Wo bara hai bakhtawar meetha Madina marhaba