مصطفی کن میں آ گئے

Thandi thandi hawa rahmaton ki chali

Ban ke mauj-e-karam Mustafa aa gaye

Hal hone lagin khud-ba-khud mushkilein

Saare aalam ke mushkil-kushaa aa gaye

Amina ka muqaddar sanwara gaya

God mein chaand jis ki utara gaya

Hoor-o-ghilmaan salaami ko jhukne lage

Parhtay Rizwan Salli Ala aa gaye

Dono aalam ki qismat badalne lagi

Noor mein saari kaunain dhalne lagi

Khush muqaddar Halima mubarak tujhe

God mein teri Khair-ul-Wara aa gaye

Kaif dil ko nazar ko basarat mili

Sab yateemon kaneezon ki bigri bani

Mit gayeen zulmatein ho gayi roshni

Wal-Qamar aa gaye Wal-Duha aa gaye

Ban gayi hai zameen rashk-e-baagh-e-jinaan

Saj gaye aasmaan khul uthe gulistaan

Maang lo rahmatein khol lo jholiyan

Dene khairaat haajat-rawa aa gaye

Noor mein hai zameen sab nahai hui

Un ki aamad pe parcham kushai hui

Mustafa ki salaami ki taqreeb mein

Naat parhtay huay anbiya aa gaye

Aaj koi bhi Saim na khaali rahay

Sab muradein milein har museebat talay

Kamli walay ki aamad ka sadqa milay

Bheek lene ko hum Ya Khuda aa gaye