مزا خوب رَمَضان میں آ رہا تھا

Maza Khoob Ramzan mein Aa Raha Tha

علامہ محمد الیاس قادری عطاری کلاسیکی دور

فونٹ سائز:

100%

پس منظر:

مَسَرَّت سے سینہ مدینہ بنا تھا

مزا خوب رَمَضاں میں آ رہا تھا

پَرے رنج و غم کا اندھیرا ہوا تھا

مزا خوب رَمَضاں میں آ رہا تھا

خبر جب کہ رَمَضاں کی آمد کی آئی

تو مُرجھائے دل کی کلی مسکرائی

کیا اَبْرِ کرم نور برسا رہا تھا

مزا خوب رَمَضاں میں آ رہا تھا

نظر چاند رَمَضاں کا جس وقت آیا

ہُوا رحمتوں کا زمانے پہ سایہ

اُفُق پر بھی اَبْرِ کرم چھا گیا تھا

مزا خوب رَمَضاں میں آ رہا تھا

کھلے بابِ جنّت، جہنّم کو تالے

پڑے، ہر طرف تھے اُجالے اُجالے

وہ مَرْدُود شیطان قیدی بنا تھا

مزا خوب رَمَضاں میں آ رہا تھا

ترانے خوشی کے فضا گنگناتی

ہوا بھی مَسَرَّت کے نغمے سناتی

جدھر دیکھئے مرحبا مرحبا تھا

مزا خوب رَمَضاں میں آ رہا تھا

فضائیں بھی کیا نور برسا رہی تھیں

ہوائیں مَسَرَّت سے اِٹھلا رہی تھیں

سماں ہر طرف کیف و مَستی بھرا تھا

مزا خوب رَمَضاں میں آ رہا تھا

شب و روز رحمت کی برسات ہوتی

عطاؤں کی جھولی میں خیرات ہوتی

مسلماں کا دامن کرم سے بھرا تھا

مزا خوب رَمَضاں میں آ رہا تھا

جو اُلفت کے پیمانے تقسیم ہوتے

تو بخشش کے پروانے تَرْقِیم ہوتے

خوشا! بحرِ رحمت کو جوش آ گیا تھا

مزا خوب رَمَضاں میں آ رہا تھا

مساجد میں ہر سُو بہار آ گئی تھی

خدا کے کرم کی گھٹا چھا گئی تھی

جسے دیکھو سجدے میں آ کر گرا تھا

مزا خوب رَمَضاں میں آ رہا تھا

فضائیں منوّر ہوائیں معطّر

خدا کی قسم تھا سماں کیف آور

دلوں پر بھی اک وَجد سا چھا گیا تھا

مزا خوب رَمَضاں میں آ رہا تھا

کلیجے میں ٹھنڈک تھی، چہرے پہ پانی

دلوں میں بھی تھی کس قَدَر شادمانی

سُکوں ماہِ رَمَضاں میں کیسا ملا تھا

مزا خوب رَمَضاں میں آ رہا تھا

مسلماں تھے خوش رُخ پہ رونق بڑی تھی

خدا کے کرم کی برستی جھڑی تھی

عبادت میں دل کس قَدَر لگ گیا تھا

مزا خوب رَمَضاں میں آ رہا تھا

سرِ شام اِفطار کی رونقیں تھیں

بوقتِ سَحَر کس قَدَر بَرَکتیں تھیں

سرور آ رہا تھا مزا آ رہا تھا

مزا خوب رَمَضاں میں آ رہا تھا

مقدّر نے کی یاوَری ساتھ جن کے

مساجد میں وہ مُعْتَکِف ہو گئے تھے

عبادت کا کیا خوب جذبہ ملا تھا

مزا خوب رَمَضاں میں آ رہا تھا

عبادت میں عُشّاق لذّت تھے پاتے

ادب سے تلاوت میں سر کو جُھکاتے

نمازوں کا روزوں کا بھی اک مزا تھا

مزا خوب رَمَضاں میں آ رہا تھا

مناجاتِ اِفطار میں رِقّتیں تھیں

دعاؤں میں بھی کس قَدَر لذّتیں تھیں

جسے دیکھو وہ مَحْوِ یادِ خدا تھا

مزا خوب رَمَضاں میں آ رہا تھا

ثنا خواں جس وقت نعتیں سناتے

تو عُشّاق سُن کر کے آنسو بہاتے

نشہ خوب عشقِ نبی کا چڑھا تھا

مزا خوب رَمَضاں میں آ رہا تھا

مبلِّغ عذابوں سے جس دَم ڈراتا

کوئی کپکپاتا کوئی تھرتھراتا

کوئی گڑگڑاتا کوئی چیختا تھا

مزا خوب رَمَضاں میں آ رہا تھا

گھڑی جبکہ رَمَضاں کی رُخصت کی آئی

تڑپتے تھے صدمے سے اسلامی بھائی

بلکتا تھا کوئی، کوئی غمزدہ تھا

مزا خوب رَمَضاں میں آ رہا تھا

دمِ رخصتِ ماہِ رَمَضاں مسلماں

تھے غمگین و حیراں، پریشاں پریشاں

شبِ عید دیکھو جسے رو رہا تھا

مزا خوب رَمَضاں میں آ رہا تھا

مجھے ماہِ رَمَضاں کا غم دے الٰہی

مٹا حُبِّ دنیا کی دل سے سیاہی

مزا فانی سنسار میں کیا رکھا تھا

مزا خوب رَمَضاں میں آ رہا تھا

جو تھے مُعْتَکِف "مَدَنی مرکز" کے اندر

بچارے تھے عطّارؔ حد درجے مُضْطَر

دمِ اَلوَداع ان کا دل جل رہا تھا

مزا خوب رَمَضاں میں آ رہا تھا

Masarrat se seena Madina bana tha