مرحبا ثاقب کے سر پر کیا سجی دستار ہے

Marhaba Saqib ke sar par kya saji dastaar hai

Hai karam Allah ka aur rehmat-e-Sarkaar hai

Tehniyat dastaar-bandi ki karo bhai qabool

Pesh karta hoon tumhein main tohfatan kuchh "Madani phool"

Garcha dastaar-e-fazeelat ko hai tum ne pa liya

Baargah-e-Haq mein kya ma'loom keh hai haal kya

Ilm jo paaya hai tum ne umr bhar baaqi rakho!

Tum parhaatay bhi raho keh bhool jaanay se bacho

Jo bhula de ilm ko woh kis tarah aalim rahay!

Yeh sanad kis kaam ki hai, ilm-e-deen darkaar hai

Aala Hazrat ke na maslak ko kabhi bhi chhorna

Un ke a'ada se na hargiz koi rishta jorna

Salb-e-emaan pursish-e-qabr-o-qayaamat se daro

Ilm ko kaafi na samjho nekiyan kartay raho

Ilm-e-deen se ho faqat maqsood Maula ki raza

Door rehna bhai nazraanon ke laalach se sada

Sunni aalim ki sada tajheel se bachtay raho

Khuwah-makhwah taghleet aur tanqeed bhi tum mat karo

Dekhna mat tum hiqaarat se kisi an-parh ko bhi

Kya khabar pesh-e-Khuda maqbool banda ho wohi

Ilm par aanay lagay tujh ko takabbur bhai gar

Dars haasil bad-naseeb Ibn-e-Siqah jaison se kar

Qehqahay aur yaawa-goyi mein tera nuqsaan hai

Ghair sanjeeda-o-bakki sun bara naadaan hai

Bhaagtay hain sun le bad-akhlaaq insaan se sabhi

Muskura kar sab se milna khoob karna aajizi

Bhaiyo! har dam bacho tum hubb-e-jaah-o-maal se

Har ghari chaukas raho Shaitan ki is chaal se

Maaldaaron ki khushaamad mein halaakat hai bari

Tu gunahon mein paray ga aaye gi shaamat teri

Kaan dhar ke sun! na banna tu harees-e-maal-o-zar!

Kar qana'at ikhtiyaar ae bhai thoray rizq par

Dil mein yeh khwaahish na rakhna sab karein mera adab

Dar kaheen naaraaz ho jaaye na tujh se tera Rabb

Qalb mein khauf-e-Khuda rakh kar tu saaray kaam kar

Kaamyaabi hogi teri In sha Allah har dagar

Dil ko ishq-e-Mustafa se bhai tu aabaad kar

Tujh pe hogi Sarwar-e-Kaunain ki meethi nazar

Khoob khidmat sunnaton ki raat din kartay raho

Tum risaala Madani In'aamaat ka bhartay raho

Jaaiye naiki ki da'wat deejiye ja ja ke ghar

Keejiye har maah Madani qaaflon mein bhi safar

Tu kamar basta raha kar khidmat-e-Islam par

Raah-e-Maula mein jo aafat aaye us par sabr kar

Maaliki ho Hanbali ho Hanafi ho keh Shaafa'i

Un se karna mat ta'assub aur na karna dushmani

Saaray Sunni aalimon se tu bana kar rakh sada

Kar adab har aik ka, hona na tu un se juda

Mujh ko ae Attar Sunni aalimon se pyaar hai

In sha Allah do jahan mein mera beera paar hai